European-ten chhiah laka Trump-a vauna an sawisel nasa

European-ten chhiah laka Trump-a vauna an sawisel nasa
US President Donald Trump-a’n Greenland neih an tumna pawmpui lo an thawhpui ram pariatte laka chhiah sang lak a tuma a vauna chu European hruaituten an dem hle.
UK Prime Minister Keir Starmer-a chuan hetiang tumna hi ‘a dik lo tak zet’ tia a sawi laiin French President Emmanuel Macron-a pawhin ‘pawm chi rual loh’ a ni tih a sawi bawk.
Trump-a hian February 1 atangin Denmark, Norway, Sweden, France, Germany, UK, Netherlands leh Finland atanga bungrua an lak luhah chhiah 10% an la dawn tih a sawi a, inremna an neih hma chuan 25%-ah pawh a kai thei tih a sawi.
Trump-a hian Danish thuhnuaia inrelbawlna hrang nei mek thliarkar hi US himna atan a pawimawh a ti a, tharuma chhuh luih mai pawh a pawi ti lo.
Trump-a vauna chungchang sawiho hian European Union chuan Pathianni tlai dar 05:00 (India-a zan dar 09:30)-ah Brussels-ah thutkhawm hmanhmawh a ko nghal a. EU-a tel ram 27 palaite an tel vek dawn niin Reuters news agency chuan a tar lang a, an thutlukna erawh hriat hman a ni lo.
Hetih lai hian Greenland leh Denmark-ah chuan mi sang tel kawtthlerah pung khawmin US-in neih a tumna duh lohna an lantir bawk.
Greenland hi leilung hausa tak, mihring cheng tlemna niin North America leh Arctic inkara awm a ni a. US hian ram dang atanga missile-a an ram beihna lo hriat hma theih nan leh heng lai vela lawng che vel thlithlaina remchang tak nia hriain thunun a duh a ni.
Trump-a hian a hma khan Washington hian ‘awlsam takin’ emaw, ‘harsa takin’ emaw a nei thei tih a lo sawi tawh.
European-te hian Denmark lam an tang a. Arctic himna chu Nato mawhphurhna a ni sa tih an sawi.
France, Germany, Sweden, Norway, Finland, Netherlands leh UK chuan Greenland-ah hian sipai tlem theuh an tir lut tawh bawk.
Inrinni khan Trump-a hian Truth Social-ah an duh dan pawmpui lote laka chhiah sang lak tur hi tar langin heng ramte hian ‘game hlauhawmtak an khel’ tih a tar lang a. A hmalakna chu ‘khawvel himna leh dam khawchhuahna tur’ a nih thu a tar lang bawk.
Thla thar atanga chhiah 10% a lak tur hi ‘Grrenland a lei fel emaw, a neih fel hman loh chuan’ June thlaah 25% lak a nih tur thu a sawi bawk.
Starmer-a chuan, “Nato-a tel vekte laka hetiang tih hi a dik lo va, US thuneitute hnenah pawh thlen a ni ang,” a ti.
French President Macron-a chuan, “Chhiah laka invauna hi a pawm theih loh tawp a, hetiang intihthaihna hi kan pawmzam dawn lo,” a t.
Swedish Prime Minister Ulf Kristersson-a chuan, “Hetianga min chhaih an tumna hi a nih angin kan kaltir dawn lo. Sweden chuan EU ram dang, Norway leh UK te biain chin fel dan a ngaihtuah ang,” a ti.
European Commission (EC) President Ursula von der Leyen-i chuan, “Ram bil inpumkhatna leh inrelbawl hranna hi khawvel dan laimu a ni a. Chhiah laka invauna hi inkar tichhetu leh a tha lo zawnga thil hertirtu a ni ang,” a ti.
Trump-a hian von der Leyen leh European hruaitu dangte hi tun kara Davos, Switzerland-a World Economic Forum-ah a hmu dawn nghe nghe.