English Premier League a talbuai Everton chuan thawhtanni khan an manager Frank Lampard an ban. Chelsea midfielder hlui Lampard hian Everton hi kum khat pawh a enkawl tling hman lo.
-- Advertisement --
EPL a team vangtlang tak ni thin Everton hi season kal mekah an che chhe viau a, vawi 20 khel tawhin point 15 chiah an la hmu a, table hnuai berah an awm mek. Manager lar Rafael Benitez chu January 2022 khan an ban a, a hmunruak luah turin Chelsea manager hlui Frank Lampard an la lut. Lampard hnuaiah beiseina sang tak nen inlan bawk mahse eng ruai an nih phah chuang lo. EPL an khelh hnuhnung 12-ah vawikua zet an tlawm a, tlahniam thei dinhmunah an ding mek.
Lampard hian Toffees hi inelna hrang hrangah vawi 44 a kaihruai hman a, vawi 12 a chakpui a, a chakpui zat hi 27.27% niin, a enkawl tawh team Derby leh Chelsea te aiin Everton ah hian record a nei chhe zawk. A team enkawl hmasak ber Derby a chakpui zat kha 42.1% a ni a, Chelsea a chakpui zat pawh 52.4% a nih laiin Everton ah erawh record a nei chhe ta viau thung.
Everton hian Frank Lampard thlak a, an manager thar ni turin manager tawnhriat ngah Marcelo Bielsa an dawr a. Leeds United manager hlui Bielsa bakah hian Sean Dyche chu an manager thar ni tura rinkai zingah a tel ve bawk.