Thawhtan zing khan NBA regular season khelh chhunzawm a ni a, inlehthalna lian pahnih thlengin LA Lakers chuan Portland Trail Blazers an lehthal a. Brooklyn Nets pawhin champion lai Golden State Warriors an hneh ve bawk.
Season kal meka beisei phak lo Los Angeles Lakers hian thawhtan zinga an hmachhawn Portland Trail Blazers lakah bul an tan tha lo va, chawlhlawk a nih meuh chuan point 25 zetin hnufual zawkah an tang hman. Point 25 zeta hnufual zawk chungin third quarter hmachhawn mahse an chetha zui ta viau thung a. Fourth quarter a zawh meuh chuan an khingpuite hi point 121-122 zetin an hneh ta daih thung a. Portland Trail Blazers an hneh hi LA Lakers in NBA a an khingpuite an lehthalna lian zual zingah chhiar tel a ni nghal.
-- Advertisement --
Ropui taka Blazers an lehthal tum hian Lakers player pawimawh LeBron James chuan point 37 a thawkchhuak a, a chetha thawkhat hle. LeBron James hian NBA a point thawkchhuak hnem ber Kareem Abdul-Jabbar a point thawhchhuah zat point 38,387 a um zel a. Kareem Abdul-Jabbar point thawhchhuah zat a tluk lohna hi point 233 a ni tawh a, NBA record thar siam thei ngei tura ngaih a ni.
LA Lakers in Blazers an lehthal rual hian Brooklyn Nets pawhin mak tak maiin champion lai Golden State Warriors an lehthal ve bawk.
Champion lai Warriors hian fourth quarter tawp nan minute khat leh second 12 chiah a awm tawh laiin point khatin hma an la hruai a. Chak ngei tura ngaih an nih tawh laiin Brooklyn Nets in na takin an nawr let a, hun tlemte ah point nga lai thawkchhuak zawnin Brooklyn hian point 120-116 in hnehna an chang let ta daih. Warriors an lehthal theih nan hian Brooklyn Nets player pawimawh Kyrie Irving chuan point 38 a thawkchhuak a, an chakna hnar pawimawh tak a ni.