FA Cup – City an tlang hram

Inrinni zan khan English FA Cup khelh a ni a, Manchester City chuan an mikhual Plymouth Argyle lakah si an phurh hmasak zet hnuin hnehna an chang let a, round sang zawk khel turin an tlang thei hram. City rual hian EPL club AFC Bournemouth leh Crystal Palace ten hnehna an chang ve bawk.
Champion tura rinkai zinga mi Manchester City hian Etihad Stadium-ah championship club Plymouth Argyle an mikhual. Pep Guardiola team te hi awlsam taka chak tura ngaih an nih laiin si an phur hmasa teh tlat. An mualah goal chhuah hmasa mah se 3-1 in hnehna an chang let thei hram thung.
Etihad Stadium-a lenglut Plymouth Argyle hian nuam ti takin an khel a, an che vel hmuh a nuam hle. City in na taka an nawr karah an him thei hram zel a, beisei aiin an ang rei thei daih. Goal chhuah deuh mawlh mawlh tura ngaih an nih laiin goal an thun hmasa teh mial bawk. Plymouth tan hian Maksym Talovierov chuan minute 38-naah corner aanga ball kal a tauh goal a, hmahruaina goal a thun. City lakah goal an thun hmasa nawlh hi inkhel tihmuhnawm zualtu a ni zui bawk.
Goal an chhuah vangin City muthlu an harh kawk a, goal an thun nghal thuai. Goal an chhuah aanga minute 8 hnuah defender Nico O’Reilly chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal a luh belh lawk thei lo. Goal a luh theih loh reng hnuin City goal khatna thuntu O’Reilly chuan hma an hruai letna goal a thun. 2-1 a hma an hruai hnuin Kevin de Bruyne chuan minute 90-naah City goal thumna a thun zui leh a, an chakna a nem nghet. De Bruyne goal thun hnu hian goal dang a luh belh thei tawh lova, City chuan championship club Plymouth lakah hnehna chang hramin, 5th round an paltlang.
Inrinni zana inkhel dangah EPL club pahnih AFC Bournemouth leh Wolves te an inhnehtawk viau. Team hnihte hi 1-1 a an inhnehtawk hnuin penalty shootout ah mualneitu Bournemouth in 5-4 in hnehna an chang hram a, round sang zawk an inhlangkai ve bawk. Bournemouth in hnehna an chan rual hian EPL club Crystal Palace in an mikhual Millwall an hneh a. Preston North End pawhin an mikhual Burnley chu si thum fai ngawtin an lo sawp ve bawk.
Inrinni zan FA Cup-ah inlehthalna lian thleng a awm lo va, chak tura rinkai ten hnehna an chang thei hlaw