Family pension-a eirukna tenawm tak hi!

August ni 17, Thawhtanni tuk a ni a, he chanchinbu The Aizawl Post headlines ka han en thuak thuak naah ‘Family pension-ah eirukna nasa, hma lakpui turin kohhran ngen’ tih thupui a lo chuang vung mai a, min deh dan chu a na zar mai.
Eng vanga family pension dik loa lakna awm thei nge?
Ngaihtuahna a kal thui hle mai. Family pension dik loa lakna awm hi Accounts & Treasury hotute hian tunhnaiah an hrechhuak thar nge tunhmain an hre ru tawh a, an sawi chhuak duh rih lo? tih hi zawhna hmasa chu a ni. Kan sawrkar kalphungah hian Democracy hi kan hmang sual viau ta nia hriatna ka nei a, a chhan chu kan ram min hruai duhtute hian kan tana thil tha tiha ro min rel sak tum ai hian vote hmanga thuneihna chan hnua mahni inhaivur duhna nei te, leh an sawrkar chhunga an mi leh sate vulh thau duh an awm thin avang hian mipuite pawh hian remchang kan hmuh hunah dik lo taka pawisa dawnna tur hi kan melh reng a, a kua kan lo hmu ve leh thin ni te pawh hian a lang. BPL kan han ti a,’Below Poverty Line-Mi khawsak harsate tehfung hnuaia awm kha mizo rilru ‘rinawmna’ leh nunphung kan chhuan em em tlawmngaihna, khawvel ramdang mi tuma neih ve loh te chuan he BPL nihna hi kan zak ta lo?! BPL tehfunga mi khawsak harsate In chhung bungrua neih dan te, kumkhata sum hmuh chin hmu pha lo te leh lirthei neihdan te thlenga tehfunga BPL ni miah lo tur tam tak khan Politic kalsual/vote zawnna vangin BPL an ni ta teuh mai a. Mipui leh sawrkar hian he BPL member nih chungchangah mawhphurhna kan insem niin ka hria. ‘BPL ah kan lo thun che ang a, min lo vote ve aniang chu?’ tih tawngkam te kha a lar viau, a mak thlawt a ni.
Hetiang hian kuttling loa sum kan hmuhna turah chuan kohhran a rawngbawltu nihna kan chan ve te chuan awmzia a nei lo a, ringlomite awmdan dik takin thil dik lo hul hual kan ti a nih hi! Chuvang chuan family pension dik lo taka lak pawh hi a lo awm taah ka ngai. Pawisa sem, a dera mi harsate hmangaihna leh chawikan tumna lama politician ten hma an lak thinna hian kan rilru a ti piangsual nasa em em tawh a ni. NLUP kan ti, SEDP kan ti, NLUP tha mi kan ti, a tam zozai tawh lutuk? Sum dik lo taka kan hmuh duhna thinlung min put tir tur hian politician te hian mipui mi min bawl phuan suah suah mek reng chu anih hi!
Pension diklo-a lak chungchanga mawhphurtute
Pension buaipuitu Account & Treasury, Local Fund & Audit-a thawkte chuan hreh tak chungin he pension eirukna hi tihbo an duh a, a hnarkaitu ber ni-a an hriat ‘Kohhran’ te chu ko khawmin kohhran hrang hrang 34(sawmthum leh pa li) lai atangin palai pahnih theuh an kalkhawm a nih kha?? He inkawmkhawmnaah hian family pension lak theih dana pawm loh, hre reng chunga la lui tlat an tam zawk thu sawi chhuah a nih rualin hriat loh vanga la an awm tih sawi a ni bawk a, hriat loh vanga la hi tlemte ni mah se mak ka ti hrim hrim. Kohhran chuan a beramte a hrechiang tura ngaih a nih laiin, mahni nu leh pa emaw, nupui pasal emaw thih ni tih danglama Death Certificate siam te hi a va han mak ngai em ve le?! Chumai a la ni lo, innei lai reng inthen tawh anga certificate siam te, innei reng reng lo innei anga marriage certificate siam te an awm a, hetah hian kohhran hian mawh a phur niah ngaih a ni a, a zahthlak tak meuh meuh!
Ration card dik lo siam chungchangah hi chuan Local Council leh YMA te hi an mawhphurhna a inchen thei ang a, hei pawh hian Local Council lam thlir chuan vote zawnna tenau a ni thei a, YMA lam erawh hi chuan eng vanga hetiang document dik lo pekna tura ke a lo pen ve chhan erawh ka hrethiam pha chiah lo.
Account & Treasuries Local Fund Audit & Pension Director a fakawm
Heng thil dik lo hi office thuthmun atang chuan hriat hi a har dawn tih a chiang reng, a chhan chu document dik lo kohhran,YMA leh Local Council ten an lo pekchhuah miau vang a ni. Eng tianga he pension dik lo taka lak hi hriat chhuah nge a nih ka hrethiam lo nain he office-a hnathawktu thenkhat, mahni vengchhung mi leh sa, dik lo taka family pension an lak lo hria an awm nual ang a, chumite chuan huaisen takin Director, a nih loh pawhin Officer thenkhat Family pension khawihtute an sawi hmuh ang a, tichuan chhui zui niin he thil tenawm tak hi an hre chhuak ta niin ka ring ngawt a, a dik kher lo mai thei? He thu hi Director beng a han thleng a, documentary proof tha tak an han hmuh hnu chuan a ‘kaikuang ber’ ni-a ngaih kohhran pawl hrang hrangte chu phungbawmah an han sawm ta chu a ni a, kohhran tan chuan lawmawm tih aiin zahthlak tihna a lian thei awm e? Kohhran Upa thlan huna an vote duh vangin document dik lo hi an siam sak han ti dawn ila kohhran upa thlan tlin nan chuan vote hmuh tam a ngai si a, ni theiin a lang si lo a, eng vanga hetiang document dik lo hi siam a nih tih chu zawhna lian tak a ni kan tih tawh kha.
Engtia hmalak tur chi nge ni ta ang le?
Eng pawh chu ni se, kum engtik atang khan nge hetiang family pension dikloa lak hi a lo awm tan tawh, sawrkar/mipui pawisa engzatnge mi duham te chuan an lo hui tawh? tih hi hriat a chakawm khawp mai. CCS Pension Rules 1972 hnuaia family pension lak theihlohna dan chi 7(sarih)(sawilang tawh lo mai ila) palzuta kha leh chen lo awm tawh te khan sawrkarin hun tiam a siam 30th September 2026 ral hma ngeia an pension lak surrender hi ti ngei se.Tin, kohhran lam pawhin kohkhawm an nih ang hian kohhran member te hnenah ‘ngenna’ thuchhuah siamin bawhzui se a tha ngawt ang.
Tin, Mizoram Civil Pensioners Association te hian an branch hrang hrang chhunga family pension dikloa la te hi chhui chhuak se la, ngawi rengin chutianga dan dikloa family pension la te chu an hnena surrender mai turin hma la se, sawrkar tan pawh a hahdam thlak ngawt ang.
Tlangkawmna
Khawvel School tha ber, Pre-Beginneer atanga Puitling thlenga Sunday School Pathian thu inzirtirna nei, Camping/Crusade vawi tam tak Revival Speaker te hmanga nei thin, kohhran mipuite thawhlawm hmanga Missionary engemawzat chawmtu leh Biak In ropui sakna atana Loan sang tak puk ngam kohhran te hian khawilaiah hian nge hetiang thil diklo hi kan lo tih tan tih te pawh hi in enlet a ngai ta tak meuh meuh mai? A lehlamah chuan hetianga dan dik loa family pension la thei tur hian Department lamah pawh a ruka lo tihpuitu, an pension lak atanga engemaw therhlo lo la te pawh hi awm ve theih tho a ni a, mahse, hei hi chuan rinduap a kai hle thung awm e? (Department lam thawk ten min lo hrethiam se)
Thil chiang em em ni ta chu ‘eirukna’ hian zung hi a kaih thuk tawh em em a, eirukna chu he chanchinbua ka ziah tawh ang khan ‘a ruk thei ang bera tih’ a ni miau a, eiru kan tih te hi chhui chhuah an har hle a nih hi, rinthua sawi bak chu? Tichuan, kohhran hrang hrang hian Department-a thawk ten thawhpuia an sawm hi a finthlak hle tiin hnu ka han khar ang e.