FCAA 2023 leh Total Bandh

Ramngaw humhalhna dan siam that “Forest (Conservation) Amendment Act, 2023” chuan Mizoram tan harsatna leh buaina a siam hnem malh malh ta hle.
A tawi zawngin: MNF sawrkar laiin he dan siam that dodalna resolution kha August ni 22, 2023-ah pass a ni a. Kum hnih a han liam leh a, ZPM sawrkar chuan he dan pawmna resolution hi a rawn pass ve thung a. Hei hi pawl hrang hrang pawhin an duh lo a, sawrkar chu FCAA pawmna hnuklet leh turin an phut a, MNF party chuan ram leh hnam himna atana pawi thei a ni tiin vawiin hian total bandh a huaihawt phah ta hial bawk a.
He dan siam thar FCAA 2023-in India dan pui Article 371G hmanga Mizoram humhalhna dan a rawn palzut dante pawh politician, mithiam leh chikmiten an sawiin an ziak hnem malh malh ta hle a. Sawrkar lamtang ni ve lem lo, mimal leh pawl hrang hrang zingah, ‘FCAA 2023 hi Mizoram tan a hlauhawm lo a, kan thatpui tur zawk thil a ni’ tia sawrkar tanhmun thlawp zawnga tang kawh tlat hi an awm lo niin a lang.
India dan pui Article 371G-in Mizoram a humhalh dan te, FCAA 2023-in Mizoram humhalhna (special provision) a rawn palzut theih dan te pawh kan hre bel tawh ang; chu lam chu lo dah tha ta ila.
He dan thar hian makna deuh a nei a. A thuhmahruai (Preamble)-ah chuan, kum 2070-a Net Zero Emissions dinhmuna ding hman tawh tur leh, kum 2030-ah chuan carbon sink 2.5 billion tons atanga 3.0 billion tons siam hman tura inbuatsaihna hmachhawnna atan he FCAA 2023 hi siam a nih thu a chuang a. Hetih lai hian, tuna kan buaipui luai luai tak, ramri atanga Km 100 hawlhtlang huam chhunga forest |hiah theihna zeh tel a ni lawi si hi, ‘Forest Humhalhna Dan’ ni lovin ‘Forest Tihchereuna Dan’ tih mai theih tak pawh a ni awm e.
Khawvel lum zel (global warming) tur dan nana India ram hmalakna tur Prime Minister-in kum 2021-a COP26 Summit, Glasgow-a neihah, ‘Net Zero by 2070’ hi a puang a. Chumi tihhlawhtlinna tura Dan siamthat hming puttir si hian, ‘100 Km’ hi zeh tel a ni leh lawi si a, a inkawlkalh hrim hrim a ni. Chubakah boruak chhia (carbon dioxide) hip bo tura ramngaw siam belh sauh sauhna tur (carbon sink) target (2.5-3.0 billion tons of CO2) nen pawh FCAA 2023 hi a inkalh viau bawk.
Hmasawnna hna thawhna kawnga forest clearance awlsam phah sawtna tur a nih vanga ‘Dan Sakei’ ang hiala ngaih tawh kan pawmzam leh mai a nih chuan, hmasawnna pawh hi keini ram zimte tan hi chuan, a bawh dan chintawk kan thiam hi a pawimawh a, chu chu ram hruaitute hian an thinlung phekah hian ziak tlat thin se a duhawm hle a ni.