FCRA Bill 2026 leh Mizoram

Kar leh July ni 20 atang hian Parliament fur thutkhawm (monsoon session) tan a ni leh dawn ta a. He session-a ngaihtuah tur pawimawh tak tak zinga pakhat Foreign Contribution Regulation (Amendment) Bill, 2026 chu kristian-te inrelbawlna nghawng tur a nih avangin Kristian tamna state Mizoram pawhin a lo urlawk viau a. Political party hrang hrang leh kohhran hrang hrang bakah a pawl ang te pawhin, he Bill duhlohna hi auchhuahpui a lo ni tawh a. Kumin April thlaa Kerala inthlanpui neih dawn lai vel khan parliament-a ngaihtuah tur zingah FCRA Bill hi chhawp chhuah lo ni tawh mah se, dodalna a nasat vangin sawi ho a ni ta lo kha a ni a, tun monsoon session-ah hian sawi ho tura chhawp chhuah a ni leh ta tho a ni.
He Bill hi Foreign Contribution (Regulation) Act, 2010 siamthat tumna a ni a. He Dan hian ram pawn atanga sum leh thilpek dawn leh hman dan a vil a. FCRA hi 1976-a siam a ni a, 2010, 2016, 2018 leh 2020-ah te siamthat a lo ni tawh a. India sorkar sawi danin tunah hian pawl 16,000 vel FCRA hnuaiah an inziak lut a, kum tin cheng vaibelchhe 22,000 vel ram pawn atangin an dawng thin.
FCRA Amendment Bill, 2026-a thil inthlak danglam chu, Chapter IIIA thar siam belh leh Section 15 thlak a ni a, “Designated Authority” a awm tawh dawn a. He Authority hian NGO te FCRA registration a cancel emaw, anmahni ngeiin an surrender emaw, a tawp tawh emaw chuan ram pawn sum atanga siam an sum leh an property zawng zawng a enkawl thei ang a, a laksak thei ang a, a hralh thei bawk dawn a ni.
Hemi chungchangah hian Catholic Bishops’ Conference of India (CBCI) chuan ‘hlauhawm leh manganthlak’ tiin a lo sawi tawh a, ram mipui te zalenna leh minority te tana zalennaah sorkar a rawn inrawlh lutuk, an ti. FCRA expiry avanga sum leh property laksak theihna hi “Democracy kalh, Constitution kalh, leh natural justice kalh” an ti bawk. Congress chuan “chhuhsak leh laksakna hna” tiin an sawi a. Sorkar lam chuan, ‘rilru dik lo pu, ram pawn sum hmanga sakhaw inleh luihtir tum leh sum hmang dik lote tan chauh a hlauhawm, a ti ve thung a ni.
Designated Authority thuneihna turah hian, thil dik lo tak awm thei ta chu, Renewal dilna hi a hlawhtlin leh hlawhtlin loh chu DA kutah hian a awm miau avangin, an duh duh an titawp hmak hmak thei dawn tihna a ni ber a. Renewal hnawl a nih tawh chuan, pawltkohhran property chu sorkar ta a ni tawh mai dawn a ni.
Eng pawh ni se, India rama Kristian-te tan chuan sakhaw zalenna rahbehnaa ngaih loh theih a ni awm lo ve. He Bill duhlohna leh dodalna thawm pawh hi kohhran mal emaw, pawl mal emaw, party mal emawa kalpui mai lova, inkaihkuah khawm chunga thawm neih chu a ri a ring deuh ngeiin a rinawm.