FCRA leh Mizoram

Foreign Contribution (Regulation) Act amendment kalpui turah Chief Minister Pu Lalduhoma chuan an duh dan sawrkar laipuiah an thlen anga, an thu thlen hi sawrkar laipuiin an pawm theih chuan Mizoram MP-ten tha takin Parliament-ah sawrkar lai an thawhpui anga, an rawtna an pawm thei lo a nih erawh chuan an dodal dawn tih a sawi a.
India sawrkarin FCRA siamthat a tum dan chu pawm theih nia an ngaih loh avangin Mizorama kohhran hruaitute chuan chief minister hoin Union Home minister Amit Shah hmaichhana sawipui an tum a, memorandum an thehlut dawn a ni.
FCRA siam thatna tur Bill chungchangah Mizorama political party hrang hrangte chuan an tan hmun (stand) an auchhuahpui tliar tliar hlawm a, an dodal tih chiang taka tarlan a ni. Hetih lai hian, Mizoram BJP erawhin ‘dodal’ tih tawngkam hi an an sawi chhuak lo a, anni hi chuan ‘dodal’ tih tawngkam hi an chelek ve tura ngaih lah a ni hek lo.
Hetih rual hian FCRA amendment Bill chungchang hi Mizoram BJP President hian a sawi chhuak tlem hle niin a lang bawk.
Hetih lai hian, Mizoram BJP General Secretary Delson Notlia erawhin ‘Sorkar laipuiin he dan a siamthat chhan chu foreign sum hman dik loh a tam vang a ni a, pawl thenkhatin terror group te nena inzawmnaa an hman vang a ni’ tiin tun hnai khan a sawi chhuak a.
Kerala BJP State president Rajeev Chandrasekhar chuan he Bill hi Kohhran hrang hrangte ngaihdan ngaihthlak leh chinfel hmasak phawt hnuah chauh Parliament-ah pass a ni ang, a ti a.
Union Minister Kiren Rijiju chuan, ‘he Bill tum ber chu ram himna leh ram tana pawi thei thil tihna atana foreign funding hman khap a ni’ tiin a lo sawi tawh bawk a ni.
Union minister-in ‘ram tana pawi thei’ atana foreign funding hman khap a nih tur thu a sawi leh, Mizoram BJP General Secretary-in ‘pawl thenkhatin terror group te nena inzawmnaa an hman vang’ tia an sawi hi a dik a nih chuan, hriat theih chinah hetiang thil atana foreign funding hmang hi Mizoramah an awm tih thawm hriat tur a la awm lova, an lo awm a nih chuan a dik lo a, chutiang mite chu foreign funding dawng zel tlak pawh an ni lo tihna a ni mai a. Mahse, Mizorama kohhran leh pawl, foreign funding dawngtute hi chuan ram tana pawi thei thilah an hmang ngai lo tih tlang hriat a ni a, chuti chunga registration tihtawpsak an nih chuan, chhuanlam tling lo hmanga inrahbeh tumnaah a ngaih loh theih dawn lova, helai point tak hi tihchian ngai lai ber chu ni ta berin a lang.