Federer record khumtu Djokovic

US Open 2023 khelh mek chu Thawhleh zan leh Nilai zing lam khan quarter-final hmasa pahnih khelh a ni a. Novak Djokovic chuan a khingpui Taylor Fritz lakah awlsam takin hnehna a chang a, Grand Slam semi-final lut hnem record thar a siam. Serb hian Grand Slam final a khelh vawi 47-na turah tualchhung tlangval Ben Shelton a hmachhawn ang.
US Open-a vawi thum champion tawh leh Grand Slam-a vawi 23 zet champion tawh a, Tennis player ropui bera ngaih ni mek Novak Djokovic hian Thawhleh zan khan inelna kal meka mipa quarter-final hmasa berah American Taylor Fritz a hmachhawn a, an in tum tawh zawng zawnga ala hneh vek Fritz lakah set hloh lova hnehna changin, semi-final a lut.
World No. 1 thar ni a, No. 2 ni mai tur Carlos Alcaraz nen an inkar tizau tura hma lam pan zel Djokovic hian Taylor Fritz lakah bul a tan tha viau a. Set khatnaah khawng taka inlanin, kawng hrang hrangin a khingpui a thunun hmiah a, break a nei zawn mawlh mawlh. Set khatnaah hian game khat chiah a hloh a, awlsam takin set a la phawt.
Chhe takin bul tan mah se Arthur Ashe Stadium a mipui tan rawn hlawh tualchhung tlangval Fritz chu set hnihnaah a khel tha hret a. A la ngam ngai reng reng loh Djokovic a chhaih buai ve ta fo. Khel tha chho in, set lak ve theih mai beiseina nei hman bawk mah se hun pawimawh takah a serve a hum zo lo hlauh a, Djokovic bawkin set a la nawn leh.
Set thumnaah pawh an khel tawk zui leh viau a, game an inlak chhawk zak zak hnuin Djokovic bawkin break a nei leh. Break a neih leh hnuin a serve a hum zo lo teuh viau a, a thin tertek a chhuak leh teuh hman viau bawk. Harsa taka a serve a hum hram zel hnuin set a la nawn leh ta nge nge a, 6-1 6-4 6-4 a hnehna changin quarter-final a inhlangkai ta a ni.
Player ropui Djokovic hian US Open-ah a zawnin quarter-final vawi 13 a lut tawh a, hei hi US Open record a ni. Taylor Fritz hneha semi-final a luh chiah khan Grand Slam-a semi-final lut hnem record Roger Federer nen an intawm chu thaichhiain record thar a siam a. Tennis player zinga ngainat hlawh ber Roger Federer record 46 chu Nole hian a khum a, a vawi 47 nan Grand Slam semi-final a lut ta a ni. Grand Slam-a Champion tam lamah te, Grand Slam-a semi-final luh tam lamah te, World No. 1 nih rei lamah Djokovic hian Federer record a lo khum tawh a. ATP Finals-ah a champion leh thei a nih chuan ATP Finals-a champion ngun ber record thar a siam ang a, Federer record bawk a khum zui leh ang.
Mipa lamah Grand Slam-a champion ngun ber ni mek Djokovic hian hmeichhe lama champion ngun ber Margaret Court record tluk turin US Open 2023-ah hian vawi khat chak chiah a mamawh tawh a. Inelna kal mekah a champion thei a nih chuan Grand Slam-ah vawi 24 champion in, Margaret Court nen Grand Slam-a an champion zat a intluk ang a. Inelna hautak zawk chu mipa inelna a nih miau vangin ropui ber chu Djokovic hi a ni ang. Djokovic hian semi-final-ah ni danga ala hmachhawn ngai loh Ben Shelton a hmachhawn dawn a, service na tak Shelton nen inkhel hmuhnawm an lantir ngei a rinawm.
Nilai zinga quarter-final thawh hnihna, Novak Djokovic hmaa ding tur tihchiannaah American pahnih Ben Shelton leh Frances Tiafoe ten inkhel hmuh-nawm an lantir a. Kum 20 mi Shelton chuan set khat hloh chungin hnehna a chang a, a vawi khat nan Grand Slam semi-final a lut.
Shelton hian amah aia tawnhriat ngah Tiafoe lakah bul a tan tha viau a, a service na tak a chhawr tangkai a, game hnih chiah hloh chungin set khatna a la. Set hnih naah Tiafoe a chetha ve thung a, hma taka break a neih chhawr tangkaiin Tiafoe hian game thum hloh chungin set a la.
Set khat ve ve an lak hnuin, set thumnaah an inhnehtawk viau a, break an inneih chhawk zak zak. Tiafoe in break a nei hmasa a, hma hruai fal theihna hun remchang a neih laiin a serve a hum zo lo zui leh tlat thung a, an game lak zat a in ang leh. Set la tura fal an awm theih loh vangin tie-break an khel chhun-zawm a, Tie-break-ah set lak theihna hun tha an neih an chhawr tangkai thei lo ve ve a. Tiafoe chuan set lak theihna hun remchang zet nei mah se a chhawr tangkai thei leh ta tlat lova, Shelton tan hun remchang inherchhuak ve lehin, a hun tha a chhawr tangkai a, set a la leh ta nge nge.Set a lak leh hnuin set linaah chungnung takin kum 20 mi Shelton hi a inlan zui a, break nei zawnin, game hnih chiah a hloh a, 6-2 3-6 7-6 (9-7) 6-2 a hnehna changin semi-final a lut.
Tarlan tawh angin semi-final a intum tur Novak Djokovic leh Ben Shelton te hi an la intum ngai lova, a vawi khat nan semi-final-ah an inhmachhawn dawn. Shelton hi a khel tha chho viau a, a service na zet a chhawr tangkai thei hle. US Open khelh mekah hian Ace ngah ber dawttu a ni mek a, a tha a thain, a la naupang bawk nen Djokovic lehthal turin theihna a nei. Hetihlai hian Djokovic hmachhawn hi a na mai lo hle. French Open semi-final-ah Alacaraz nen an inhmachhawn tumin Alcaraz hi a inhliam a(Chawn tha chat) a inhliam chhan hi Djokovic hmachhawn tension sang lutuk vang a nih thu a sawi. Mi dang laka khel tha tak Shelton ngei pawh hi Djokovic hian thlau dai lehin, a hneh leh nge nge mai thei bawk.