Feet 18,000 a sangah ski-base jump-in record siam

Joshua Bregmen, kum 34, chuan ski-base jump sang ber record siamin, Himalaya tlangah feet 18,753 (metre 5,716) a sang atangin a vur thlengna nen a zuang a, parachute hmangin him dam takin leiah a tum leh a, a hmaa hetiang record, feet 14,301 (metre 4,359) atanga zuanga 2019-a Matthias Giraud record siam a rawn khum ta a ni.
UK a cheng Joshua hian a record siam hi Nepal-a human trafficking chungchanga awareness neihna tur sumtuak nana a tih a ni a, record siam tum hian hmun remchang zawngin Himalaya tlangah an lawn a, hmun remchang deuh lai an hmuh chu ski jump tih nana siamremin, record a siam thei ta a ni.
Ski-base jump hi vura tleng chunga kham sang taka zuanthlak a ni mai a, Joshua pawh hian khama a zuanthlak hmaa chak taka vura a tleng theihna turin a runway te an siam rem a, a zuanna tur hmun hma vel siamin nilengin an bei a, zanah an riak zui nghal a, zanah vur tlem a lo sur leh bawk a, a tukah record a siam thei ta a ni.
Joshua hi chak taka vura tlengin, a vur thlengna thuam famkim bakah parachute a pai bawk a, tichuan kham sang takah zuangin, a paracute a pawtparh a, damtakin a tum leh thei ta a ni. A ski-base jump tihna i feet 18,753 a sang niin, Guinness World Record a siam ta a ni.
Joshua chuan record a siam thei chu lawmawm a tih thu sawiin, “A risky viau mai a, a sang tawh a, oxygen kan ngah tawk lo bawk nen, thawk a sak talh tawh mai a, khatiang chhunga ski jump tih kha chu thil zawngchhang tlak tak chu a ni lo,” a ti.