Feh kawng laih nan MLA Fund ka hmang nasa – Er Lalrinawma

A bial mipui zaa 75 vel chu lo lam hna thawk thin an nih avangin a fund an hman tamna ber pakhat chu feh kawng laihna a ni tih Tuikum bialtu MLA, minister Er Lalrinawma chuan a sawi.
A bial chhung khua Chhiahtlang Venghluna Health Clinic Centre thar sak, Thawhlehnia a hawnnaah hei hi Er Lalrinawma chuan eizawnna, hriselna leh zirna te chuan a rilru a kap lian ber reng a, hmalakna pawh an kalpui tam tih sawiin, a bial chhunga mipui zaa 75 vel ten nitin hna thawka an lo lam an pan thin avangin, a lo nawmsak zualna’n an feh kawng an lai nasa hle a, MLA Fund an hman nasat berna pakhat a ni, tiin a sawi.
Hriselna lamah hma an sawn theihna’n hma an la nasa tih a sawi bawk a. Sub Centre zawng zawng Health & Wellness Centre ah an hlangkai vek tawh a; Health & Wellness officer-ten an thutchilh nghal vek a, hrileng dona kawngah pawh an thawhhlawk hle tih a sawi. Hmun engemawzatah Clinic Centre pawh hawngin, an tangkai em em vek tih a sawi a. Tuna an hawn pawh hi Chhiahtlang North mipuiin tangkai taka an hman a beisei thu leh mamawh an neihte a theih ang anga ngaihtuah a nih tur thu a sawi a ni.
Chhiahtlang North Health Clinic hi thawktu, health worker pakhat leh helper pakhatin an thutchilh anga, an hnuaiah ASHA pathum an awm ang. Centre building hi Chhiahtlang North VC-in NH 54 compensation sum an dawn hmanga an sak a ni a. A buildingah hian Bazar, Chhiahtlang North VC House leh Health Clinic Centre te a awm a ni.
Thawhlehni vek khan Er Lalrinawma hian Chhiahtlang Higher Secondary School-a zirlai hlawhtlingte lawmpuina a hmanpui a. School building thar an mamawhna san zia a hriatpui thu sawiin, a sakna tur sum a dap kual nasa tawh hle a. An fund beiseite an nghah mek lai hian, a bul hi MLA Fund cheng nuai thuma lo tan phawt mai a a that a rin thu sawiin, a MLA Fund chhuak hmasa ber atanga a building bul tanna tur a pek tur thu a sawi a ni.
He school hi kum 2014-a din a ni a, 2017-ah provisional pek niin, kum 2018 ah lumpsum aided-a hlankai a ni. Sawrkar atanga tanpuina an dawn baka an sum mamawh hi Chhiahtlang mipuiin an thawhkhawm thin.
Kumin HSSLC exam-ah zirlai 20 exam hmachhawnte an pass vek a, pakhat distinction a ni a, first division paruk an awm. An din tirh kum, 2014-a zirlai pakhat a fail tih loh chu kumin thlengin kumtin HSSLC ah an zirlaite an pass vek zel a, a din tirh kuma fail naupang pawh hi a kumlehah a pass zui avangin he school-in HSSLC zirlai an neih zawng zawng naupang 166 hi an la pass kim vek a ni.