Fenerbahce zawm tur Dzeko

Veteran stiker Edin Dzeko chuan Inter Milan chhuahsanin, Turkish club lian Fenerbahce a zawm dawn a, kum hnih daih contract a ziak dawn.
Kum 37 mi Dzeko hian Inter Milan-ah a contract a hmang zo a, Inter hian contract thar ziahpui tum bawk mah se a hnar a. AC Milan in lak tuma an dawrna a hnar bawk. Serie A-a cham chhunzawm leh ai chuan chona thar hmachhawn tura chhuah a thlang a, kum hnih cham turin Turkish club lian Fenerbahce a pan dawn a. Kum khatah £3.6m a hlawh phak dawn niin tarlan a ni.
Fenerbahce striker thar tur Dzeko hian VfL Wolfsburg-ah a hming a chher hnuin kum 2011 khan English club lian Manchester City a zawm. City hi Premier League-ah a champion pui. City atang hian loan in AS Roma a zawm a, Roma hi kum 2016 khan a nghetin a zawm. Roma tan hian vawi 168 khelin goal 77 a thun a, a chet thatpui hle. Roma atang hian Inter Milan a zawm leh a, Inter Milan hi Coppa Italia title pahnih leh Serie A title pakhat a lakpui leh bawk. Inter Milan tan a inlan hnuhnung ber tum chu champions League final-ah Manchester City an hneh loh tum kha a ni.
Dzeko hian club hrang hrang tan a khel kual nual tawh a, club tan goal 300 chuang a thun tawh. Kum 2007 atanga khan an ram Bosnia and Herzegovina tan a khel tan a, ram tan vawi 129 khelin, goal 64 a thun tawh. A club thar Fenerbahce hi season liam ta khan Super Lig-ah Galatasaray hnuaiah awmin pahnihna an ni a, kum 14 hnua a vawi khat nan Turkish Cup-ah an champion nawlh thung.