Eng vangin nge a theihnghilh theih loh!

Hmeichhe hmeltha leh lar, hlawhtling tak pawh a ni mahna, mahse, mipa aiin ngaihzawng hlui te theihnghilh a, nun thar bul tan an harsat zawk niin mithiam ten an sawi.
Ngaihzawng inthen a ni emaw, nupa inthen chungchangah emaw pawh ni se mipa aiin hmeichhia-in theihnghilh a harsat zawk niin relationship lama mithiam ten an sawi. Entir nan- Hollywood star lar Demi Moore pawh a pasal Ashton Kutcher-a’n a rinawm loh san vangin an inthen a, mahse, an inthen hnu kum khat dawn hnuah pawh Ashton-a’n Mila Kunis a chuks lai thlalak a hmuh chuan a la sa phat tho niin an sawi. A pasal hlui chuan midang a zuan leh hma lutuk a ti a ni ngei ang.
Hetiang hi hmeichhe tam takin an tawk tawh ngei ang. Pasal te emaw, ngaihzawng te emaw, inthen tawh hnuah pawh an thinlung kil khatah hmun an la luah ve deuh reng a, mipa aiin theihnghilh mai harsa an ti zawk niin relationship counsellor Dr Rajan Bhonsle chuan a sawi.
Dr Bhonsle chuan, “Hmeichhe tam zawk chu hmangaihna hi anmahniah a thawk muang bik a, zawi zawiin a rawn insiam thin. Hmeichhiain mipa a ngainat tak tak theihna tur chuan hun a duh deuh thin. A hmangaih tawh hnuah chuan mipaah a innghat nasa hle a, chuvangin inthen pawh a tuarna zawk thin a ni,” a ti.
Chutiang boruakah chuan engtin nge hmeichhia-in chet a lak tak ang. Dr Bhonsle chuan ti hian a ti:
1. Mi hnena kan rilru natna leh hahna te kan sawi chhuah hian min chhawk zangkhai nasa hle a, chuvangin kan rilru natna te midang sawipui thin tur a ni.
2. Rilru leh taksa sawizawi that tur a ni. Exercise lak that hian endorphins kan taksaah a tichhuak hnem a, endorphins chu min tihlim theitu hormone a ni.
3. |hian tha leh chhungkhat laina te bula awm tam tur a ni. Mahni chauha awm hian lunglen a tizual duh a ni.
4. Mahni inkhawngaihna bawihah luh loh tur a ni. Hmalam thlirin, thil thar kan la tawng leh dawn tih ngaihtuahna neih tur a ni.
5. Heng zawng zawng i tih pawha harsatna i la nei tho a nih chuan mithiam te rawn tur a ni a, counsellor rawn te hreh loh tur a ni.