Fertilizer chungchang kha…

Tun hnai khan Congress |halaite chuan thuchhuah siamin, Mizoram kaltlanga Burma rama fertilizer lakluh chu dan lo a ni, tiin, chhui chiang a, thil awm dan dik tak mipui hriattir turin sawrkar an phut a. Challan awm lo leh agriculture department atanga allotment tel loin Zorinpui (Zochachhuah)-a dah tur fertilizer hi rel hmanga rawn thleng nia sawi a ni a. ‘He thilah hian chief minister hming sawi lan a tam hle’ tih sawiin, chief minister emaw a changtu minister emaw chu sawifiah turin an phut a.
Fertilizer hi Myanmar leh India insumdawntawnna trade item 62 zinga tel a nih rualin, India ram chhungah pawh control item a ni bawk a, document emaw, labelling emaw tel lova sawngbawl theih loh a nih laiin, tuna rel hmanga lo lut fertilizer bag 10,000 vel hi chu a bag pawnah eng mah inziak a awm lo, tih a ni.
Fertilizer hi India leh Myanmar insumdawntawnna trade item hmasa berah khan a tel lova, a hnu lama item dang dah thar leh zingah a tel ta a. Rel a lo luh hma daih kum eng emaw ti zat atang tawha ramri pela dan kalha Myanmar ram chhunga phurh luh thin kha a ni a, Customs lam pawhin an man thin a nih kha.
Congress |halaite hian an sawi hmangin an hrechiang hle a nih hmel a, a chhan chu bag pawn lama eng mah inziak awm lo, bag var a nih thu thlengin an sawi thei a. Bag var, a pawna inziak eng mah awm si lo chhungah chuan eng nge awm tih hre tur chuan bag hawn a ngai ang a, a nih loh vek leh, hmunpui lam atanga rela phurh tura sawngbawl lai chiang taka hmutu emaw hretu emaw an awm a ngai ngei ang. Chuvangin, Congress |halaite hian bag var chhunga thil awm hi ‘fertilizer’ tiin an sawi chiang a, ‘fertilizer niawm tak’ an ti lo.
‘He thilah hian chief minister hming sawi lan a tam hle’ tiin Congress |halaite thuchhuahah hian tarlan a ni bawk a; ‘hei hi chief minister emaw a changtu minister emawin sawifiah rawh se’ an ti a ni ber a. Chief minister emaw a changtu minister emaw hian thil awmzia hi an sawifiah a ngai ta niin a lang.
He thil thleng nia sawi hi a lo dik tak tak a nih chuan, rei pawh la service hman lo Rel hi, smuggling hmanrua tha tak chang mai thei a ni tih a lang a. Chuvangin, ILP kan buaipui ang tho hian, bungrua lo lut lam pawh hi, dan kalh a nih leh nih loh uluk taka lo en chian zel a pawimawh hle a ni tih a lo lang leh ta a ni. Vairengte check gate-a lirthei lo lutte uluk taka lo endik a ni thin ang bawk hian, Sairang rel station-a bungrua lo thlengte pawh hi uluk taka lo endik a pawimawhzia he ‘fertilizer story’ hian a lantir a ni.