Fiahna paltlang Swiatek

Fiahna paltlang Swiatek
Ninganiah second seed Iga Swiatek chuan US Open second-round test hautak thawkhat a paltlang a, Arthur Ashe Stadium-ah unseeded hriat hlawh lo Suzan Lamens tihte mai mai laka set khat hloh chungin 6-1, 4-6, 6-4 hnehna nen third round a lut.
Pole Swiatek hi Wimbledon-a a major title pangana la zo hlimhlawt, New York tournament lian atana inbuatsaihna hnuhnung Cincinnati-a champion chunga Flushing Meadows thlang a ni a, second round level tih velah chuan harsatna lian tawk lo tura beisei a nih ang ngeiin set khatna chu awlsam fahranin a la mai a, mahse, set hnihnaah Dutch professional tennis player kha a rawn induh thar ve ta tlat a, a hmaa ding kha 2022 tournament winner a ni tih hre lo ang maiin set a chhuhsak!
Set thumnaah erawh Swiatek a chesual nawn duh lo a, la inchai tawk thial mah se third round-a 29th seed Anna Kalinskaya hmachhawn turin a tlang zui ta tho a ni.
Pole hian set hnihnaa a talbuai thu inkhelh banah sawiin, buai awk zui zel loa leirem a rah leh theih avanga a hlim em em thu leh set thumna chu a ziaawm tak thu a sawi.
Women’s singles inkhel dangah Japanese four-times major winner Naomi Osaka pawhin second round match-ah hnehna a chang ve bawk.
Seeded 23rd Osaka hian Ningani bika Louis Armstrong Stadium-a inkhel hmasaberah American Hailey Baptiste chu 6-3, 6-1-in a dah tha.
Arthur Ashe Stadium zan lam inkhelah 2023 champion Coco Gauff chuan nikum Paris Games-a a ngam loh unseeded Croatian Donna Vekic lakah harsatna lian pui tawk lehin, set hmasa zawkah Olympic silver medalist khan tualchhung mihang nula hi a chhaihbuai hneh leh hle mai a, mahse, a tawpah American third seed hian Paris phuba lain darkar thum dawn an inbeih hnuah 7-6(5) 6-2 hnehna nen kum khat chhunga Grand Slam tournament hnuhnung ber khelh mekah third round a lut.
Coaching lama a kawppui thar biomechanist Gavin MacMillan nena an tournament hma chhawn hmasaah Gauff hian harsatna tawk viau mah se 28th-seeded Pole Magdalena Frech hmachhawn thei turin a tlang a, a lehpekah chuan nuamsa deuha chak tawh turah ngai phawt ang.
First round-ah pawh khan American hi Ajla Tomljanovic nen an lo inchai ngial tawh a, darkar thum dawn an inbeih hnuah hah hnawpin second round a lut a; Paris Olympics third-round match-a a hneh loh Croatian Vekic lakah erawh chesual nawn duh loin hnehna awlsam lo tak a chang zui leh ta hram!
Hnehna a chang chiah kha a lawm lutuk insum zo lo a tap chhuak hial a, mipui lam hawiin, “Ka tana ka beihna chu a ni teh meuh mai a, mahse, in tana ti pawh ka ni e,” tiin amah thlawptu a chipuite lakah lawmthu a sawi.
Inkhel entute zingah khan American mihang hmeichhe gymnast ropui Simone Biles pawh telin, hnehna a chan hnuah Gauff hian 11-time Olympic medallist Biles chu hun khirh tak a hmachhawn laia phurna leh beiseina siamsaktu a nih thu a tarlang.
Rilru lama harsatna a tawh avangin Tokyo 2021 Games-ah Biles a inhnukdawk a, gymnastics pawh a chawlhsan mai dawna ngaihna a pian hman hial hnuah nikum khan Paris Games-ah rawn kirlehin, Olympic a hmachhawn vawi thumnaah gold medal pathum ngawt a awrh leh a; chuti taka infiammi paukhauhin a inkhel lai a thlir tih hriatna khan game harsa leh khirh zetah pawh beiseina a siamsak tih Gauff chuan Simone Biles lam hawiin a sawi.
“Ani kha ka hmu a, ka harsatna tawh atanga min tungthotu a ni. Kan inkhelh lai khan ka ngaihtuah a, inchi ruk leka chhah rahchhanah pawh khawvel pressure hmachhawn chunga a kal thei a nih chuan kei pawhin court chhungah ball ka hlap ve thei tur a ni tiin keimah leh keimah ka infuih,” a ti!