Fifa Best Awards 2023 dawng thei tur an puang
Fifa Best Awards 2023 dawng thei tur an puang
Kum 2022-23 season-a Treble ni thei Manchester City chuan 2023 Fifa Best Awards thlan turah pawh player an thawh hnem hle a, men’s player of the year award dawng thei tura khalhfal mi 12 zinga a zatve ngawt thawhin, chu’ngte chu Erling Haaland, Julian Alvarez, Kevin de Bruyne, Ilkay Gundogan, Rodri leh Bernardo Silva-te an ni.
Nominee dangte chu he chawimawina tum hnih dawng tawh Lionel Messi bakah Kylian Mbappe, Declan Rice, Marcelo Brozovic, Khvicha Kvaratskhelia leh Victor Osimhen-te an ni.
He award semchhuah hmasak pahniha lawmman dawngtu Cristiano Ronaldo chu tuntum hian nominee zingah a lang ve ta lo a, nikum December thlaa Saudi Arabian club Al Nassr a zawm vangte kha ni tak ang maw?
Kum 24 mi Rice hi English player zinga he lawmman dawng thei tura chhawpchhuah hmasakber niin, Manchester City goal-veng Ederson leh Manchester United lei thar Andre Onana chu best goalkeeper atan nominate an ni.
Manchester City boss Pep Guardiola pawh coach of the year atan nominate a ni a, boss dang pathum elpui a neih zinga pakhat chu Tottenham coach leh Celtic manager hlui ni bawk Ange Postecoglou a ni.
Women’s player of the year dawng thei tura chhawpchhuah zingah kumin hmeichhe world cup-a Spain a champion-pui hnua Spanish FA president-in a hmuia a fawh avanga lar zui ta Jenni Hermoso a tel a; England player pali Rachel Daly, Alex Greenwood, Lauren James leh Keira Walsh an lang bawk.
Women’s World Cup final khel tura Lionesses hruai thlengtu Sarina Wiegman chu coach of the year ni thei tura chhawpchhuah zingah Chelsea boss Emma Hayes nen an tel.
Hermoso bakah Spain champion-puitu dang pahnih Aitana Bonmati leh Salma Paralluelo-te pawh nominate an ni.
England goal-veng Mary Earps chu best goalkeeper atan nominee zingah a tel.
Award sem hnuhnung pahniha women’s player of the year nihna chelhtu Spain star Alexia Putellas chu tuntum hian khalhfal zingah a tel lo.
Kumin Women’s World Cup-a Spain champion-puitu Jorge Vilda pawh coach of the year dawng thei tura thlanchhuah zingah a tel lo tlat bawk.
Category tina nominee-te hi football expert rual (panel) thlanchhuah niin, he panel-ah hian Chelsea striker hlui Didier Drogba pawh kha a tel nghe nghe.
Women’s award-ho bik dawng thei tur thlangchhuaktute zingah hian United States tana World Cup trophy vawihnih hawn tawh Mia Hamm a tel ve bawk.
Tunkar Ningnai atang khan Fifa.com kaltlangin vote thlak tan theih a ni a, October thla laihawlah vote theih hun an khar ang a; voter-te hi national team coach leh captain theuhte bakah journalist thlan bik leh fans an ni.