HIV/AIDS dona hmanrua pakhat atan Red Ribbon School Quiz Competition neih mek a ni a. He competition hi sawrkar laipuia MoHFW hnuaia National AIDS Control Organisation ruahman niin, district level atanga national level thlenga kal chho tur a ni.
Kum 2010 khan HIV/AIDS do nan Red Ribbon inter village football tournament kha Mizoramah neih a lo ni tawh bawk a. Khatih hun lai khan Mizoramah HIV/AIDS a hluar zual a, thisen test atanga HIV positive hmuhchhuah kha 2007-08 khan 4.7% te a kai chho a. Red Ribbon Football tournament neih kum khan 3.5% niin, tournament neih atanga kum nga chhung kha chu HIV+ve pawh a tlahniam zawngin a kal ngar ngar a. Kum 2014 atangin a sang chho leh hret hret a, 2017 atangin 4.1% ah a lawn chho leh ta dawrh a, khata tang khan tlakhniam lam a pan thei ta lo va, 2018-19 chhung khan a tawn san ber thlengin 5.7% a kai chho dawrh a, a hnu lamah 4% chunglam a ni chho leh ta ngar ngar a, 2022-23 hian 4.06% a la ni.
Red Ribbon football tournament khan awmzia thui tak a nei niin a lang a, a hnu lam kum nga chhung zet kha chu a tlahniam zawngin a kal ve a. Tunah hian Red Ribbon Quiz competition huaihawt a lo ni leh ta a, hei pawh hian zirlai leh thalaite-ah awmzia thuk tak nei leh thei se a duhawmin a beiseiawm hle a. Chutih laiin, buatsaih a nih chhan HIV/AIDS lama awareness campaign aiin a Quiz boruakah hian kan inhmang zo mai ang tih erawh a hlauhawm a, Quiz huaihawt a nih chhan lamah thahnem ngaih a pawimawh dawn hle a ni.
Mizoramah 1990 October atangin HIV/AIDS vei hmuh tan a ni a, kum 33 a han liam leh meuh chuan HIV/AIDS vei hmuhchhuah pawh March, 2023 thleng khan 28,344 an tling ta hial a, thihpui pawh 4,227 zet an tling ta. Tun dinhmunah India rama mihring tam lam atanga chhutin HIV+ve tamna ber state kan ni a, min dawttu Nagaland nen hian kan la inthlau viau lehnghal a. HIV/AIDS do kawngah tan kan lak thar a tul takzet tawh a ni.
Red Ribbon Quiz leh a behbawm
Get real time updates directly on you device, subscribe now.
Prev Post