FIFA World Cup Final Halftime Show hmasa ber a hlawhtling
FIFA World Cup Final Halftime Show hmasa ber a hlawhtling
2026 FIFA World Cup Final halftime show chuan FIFA lamin an beisei ang chiah boruak a neih rualin, football purist lamin an hlauhthawn ang chiah a ni ve thung. Football match a an ngaih puithu ber mai, World Cup final-ah minute 10 chuang pop thlipui duhthusamin a tleh tlat.
MetLife Stadium, New Jersey, USA-a Spain leh Argentina ten 2026 World Cup final an khel a, World Cup history-a a vawi khat nan final match-ah hian halftime show buatsaih a ni a, pop star rual Madonna, BTS, Justin Bieber, Sakira, Burna Boy, Gustavo Dudamel leh Chris Martin ten halftime chawlh lawk boruakah stadium an thap hneh hle. Chawlhlawk a rei lo a, second tin mai an hmang tangkai em em vek a ni mai e.
Madonna pawhin Queen of Pop a nihna rawn lantir lehin, fashion hmuhnawm tham nen, DJ Stuart Price leh Brazilian football legend pahnih Ronaldo leh Ronaldinho te nen an rawn inzui chhuak a, an jeep license plate-ah chuan “Maestro” tih a chuang kalh bawk. Madonna hian a hla hit 2000-a Billboard Hot 200 No.1 te pawh lo ni tawh ‘Music’ an dinchhuahpui a, stadium chhung a rawn chawk phul hneh nghal hle.
Conductor ropui Gustavo Dudamel pawhin New York Philharmonic le Simon Bolivar Symphony Orchestra te chu The White Stripes hla “Seven Nation Army” a rem pui a, pui tak a ni, hmuhnawm tham tak a ni.
Chutah BTS pawhin motorcycle-style leather jacket inbel chungin, thawmhnaw sen leh dum nen RM, Jin, Suga, J-Hope, Jimin, V leh Jung Kook te an langsar hle a, an hla hit ‘Dynamite’ an rawn thlawh a, an dance move leh hawiher tin mai mipuiin an lawm em em vek a ni ber e.
Chutah Jason Sudeikis pawh Ted Lasso mode a awmin, Justin Bieber a ko chhuak a, Bieber hian acoustic guitar rawn ak chhuakin hla muang deuh chi “Everything Hallelujah” a rawn perform a, Madonna leh BTS te nena an boruak chhem dan a inang lo viau nain, Bieber a chetha thlawt e.
Tichuan le, Shakira leh Burna Boy te hun a thleng ve ta, kumin World Cup official song ‘Dai Dai’ ngei mai chu Colombian superstar leh Nigerian star te hian an rawn perform a, lamthiam rual nen an han inthing kir vel siau siau mai chu khawdang hawisan phal chi a ni tawh lo.
Halftime show khar nan PS22 Chorus chu Coldplay frontman Chris Martin, Kermit the Frog, Miss Piggy bakah Shakira, BTS leh Dudamel ten an rawn tawiawmin ‘We Dance’ an perform a, stage-ah ‘LOVE’ tih a rawn inziak a “O” chu globe angin a lang a, halmawi chi hrang hrang nen halftime show chu hlawhtling takin an khar ta a ni.