Fifa World Cup vawi ruk khel thei zingah Mexico legend Ochoa tel hmel!

Fifa World Cup vawi ruk khel thei
zingah Mexico legend Ochoa tel hmel!
Fifa World Cup vawi nga ngawt khel tling tawh Mexico veteran goalkeeper Guillermo Ochoa chuan a tawpna atan Mexico national team rualin training camp a zawm ve leh ta tih sawiin, United States leh Canada-te nena an inthlentawm tur kumin World Cup-ah hian a inlan leh a nih chuan a professional career tawpna tur a ni nghal dawn tih a tarlang tel.
Ochoa hi tunah kum 40 mi ni ve tawhin, 2026 FIFA World Cup-a Mexico ram aiawh tur squad tihfel la ni lo mah se national team-a a tel ngheh ngei a rinawm a, Fifa tournament lianah hian a inlan leh a nih chuan World Cup tum ruk khel thei player tlemte zingah a tel dawn a, Lionel Messi leh Cristiano Ronaldo-te nen hetih kawngah hian huang khata khung theih an ni tawh ang.
Mexico tana Germany 2006, South Africa 2010, Brazil 2014, Russia 2018 leh Qatar 2022 World Cup lo khel tawh goalkeeper Guillermo Ochoa hian Thawhtanni khan a tawpna atana national team training camp a zawm thu hi puangin, thla thar June ni 11 atanga July ni 19 chhung awh tur tournament-ah hian hmuh ngei beisei leh teh ang!
Social media lamah Ochoa chuan ti hian thu a dah chhuak a, “He shirt (national team jersey) hak hi eng lai mahin routine satliah a ni ngai lo, hamthatna a ni zawk.
“Vawiin atangin national team behchhana ka training camp hnuhnungber tur ka zawm a, mahse, tuntum chu a dang ta daih a, naupan lai atanga kan lo mitthla thin he badge-ah hian thinlung chhun tlang hriatrengna thil tam tak a inzep ve tawh a, hliam ser pawh a bo bik lo,” tiin ram tana kha leh chen a khelh tak chhunga a boruak tawn a tarlang tel.
He stopper hian tun tournament hi a career tawpna a nih theih tawh thu Mexican broadcaster TUDN hnenah thla hmasa mai khan a lo sawi tawh a, chutih rualin Mexico kohna a dawn apiangin a chhungrilah che a la awm zel thu a tarlang tel.
Ochoa hian tunah Cyprus club AEL Limassol tan khel mekin, Mexico tan match 150 chuang a khel tling tawh a, World Cup-a a chetthat thin em avangin he rama player hriat hlawhberte zinga pakhat a ni mek a; kum 2014-a Brazil nen an intum tuma a ‘save’ zozai avang leh kum 2022 tournament-a Poland superstar Robert Lewandowski penalty a dansakte kha an ram lama amah vawrhlartute a ni.
Mexico hian kan hma lawk World Cup inbuatsiahna atan friendly match-ah Ghana (May 22), Australia (May 30) leh Serbia (June 4) an tum dawn a; June ni 11 khian World Cup bul an tanna inkhelah South Africa hmachhawn chungin Group A hna hmasa an thawk ang.