Final lut hmasa TNT

Final lut hmasa TNT
Thutak Nunpuitu Team-in an la thlen ngai loh ramtiam hnaih zelin Thawhlehni zan Tata SK 712 Pro Volleyball League-ah 3-1-in Tui-changral an hneh a, kum zawnin final an lut.
R. Dengthuama Indoor Stadium, Mualpuiah a hma ang bawkin TNT-in inelna nasa leh boruak sangah team tha leh tlo zawk an nihna an lantir nawn leh a, 25-23, 18-25, 25-19, 25-20-in an chak.
June ni 12 khan intawng tawhin vawi nga an deuce hnuah 30-28-in Tuichangralin set khatna an la. TNT-in hneh taka an nawrlet hnuah set thum an la zawn a, semi-final-ah set an lak dan dang-lam hret mah se Tuichangral set lak a pung chuang lo.
Vanlaltanchhana (Valbuanga) chuan vawi 24 vaw tlain point 10 a paih a, championship kal meka tum ruk an khelh tawhah a vawingana’n D3 Business Player of the Match a ni aa, a elpui Tuichangral Haryana spiker Vinod Khatkar chuan point 24 tho hlawhin 11 a hloh.
Nikum semi-final-ah TNT-in league-a chak fai vek Hunthar lehthalin 3-2-in an hneh a, final-ah Durtlang North nen intawngin set khat chiah an la. Pro Volleyball hmasa ber kum 2016 khan league-a sang ber ni chungin final an khel ve thung a, Anastasia Electric Veng hneh loin ramtiam an thleng zo lo.
Kum kaltaa an player-te vek tho kha hmasawn leh hriam zawkin an inlan a, an thlen chin atanga hmasawn turin khelh khat chak an la bak. Mizo hlanga champion hmasa ber nih tumin vawi thum final an luhna a ni a, nizan result tarlan hman loh Hunthar leh Chhinga Veng Spikers inkhel chak zawk nen Zirtawpni zanah a hmawr an bawk ang.
Kum 2018-a final khel tawh Tuichangralin a tumhnihna’n semi-final paltlang an tumna an puitlin zo lo ve thung a; set khatna laihawl atangin an insawrbingna tlahniamin ho taka point hloh an neih zauh zauh avangin TNT-in 17-14-in an kalsan a, setter Lalliankima’n hui tlain 23-16-in an sang zui leh.
Lalhmunmawia (Mapuia) chuan tum hnih leh Saidingpuia Sailo chuan vawi khat vaw tla zawn chhoin 24-23-in an inkar pawtzim leh mah se Valbuanga hlap dang zo loin TNT an tlang.
Set an lak hnuah TNT-in buai rukna an neih a lang chhuak a, taksa chak tawk lo chunga khel Makima’n nam sualin 11-7-in Tuichangralin hma an hruai. An ralthuam pawimawh Saitea, Vinod leh Mapuia’n nuam ti takin an vua.
TNT-in inkhel tihdanglam tumin K. Zodingliana an dahlut a, ani hian set hnihnaa an point hmuh hnuhnung ber thawkchhuakin 18-ah an tawp. Coach Lalhmangaihsanga Sailo chuan team remkhawm thar leh turin setter rinrawl Makima a chawlhtir a, F. Lalrinngheta a dahlut.
Tuichangralin inrintawkna nen set thumna bul an tan a, net chungah Saitea’n Zodinga hlap dang tlain Laldinchhunga vuak an dan leh hnuah Valbuanga’n a vaw kai lo a, 7-3-in an sang.
A hniam zawkah tang mah se TNT-in paukhauh takin an beilet thei a, Zosangzuala (Mama) chuan Vinod-a vuak dang thlain 10-10 a nih hnuah Valbuanga’n Lalchhanhima hlap a dang zui ve leh a, an lehpel.
Tuichangralin dinhmun tha lo atanga kirleh an harsat a, infuihphur aiin an chet dan leh an hmel atangin lungawilohna a lang a, player siksawi kawngah thu-thlukna an siam fuh tawk lo bawk. Zuan laia net tawh leh ho taka point hloh an neih thin an tuar tel.
A tir lama chet harsat Valbuanga’n a hnung leh hma atangin rin tlakin a khel a, Mapuia vuak chhangleta a hlap tlak rualin 24-19-in TNT an sang. Vinod chuan line pawnah hlap chhuak zui ve thungin dinhmun derthawngah Tuichangral an tlulut a, set hloh zui a thiang tawh lo.
TNT-in Makima dahlut lehin a tira lut paruk hmangin phur takin an khel thar leh. Vuak tlak leh net bula lo dan bakah libero Lalramnghakdika chuan ball tla tur a chhan hnem a, thiamna pawimawh hrang hrangah league-a an intawn tum ang bawkin Tuichangralin an el zo lo.
Mama’n a hui thlak hnuah chiang takin a hlap tla a, 19-14-in TNT an sang. A kawtawpa tang tawh Tuichangralin Vinod an chhawr rim a, a vuak tlak hnuah Sadraka hlap an dansak a, 21-20-in hnaih leh hman mah se beiseina an neih lai takin Valbuanga’n vawi hnih a vuak tlak kar lakah Vinod-a hlap an dang thla tel a, 24-20-a hniam zawk an nih hnuah Tuichangral tan kir leh rual a ni tawh lo.
TNT captain Vanlalchhantluanga Sailo chuan vuain lo dang leu mah se lak phak lohin a tla a, hnehna lawma hlim au thawm ri hum humin Tuichangral a chhilh hnan ta a ni.
Team tichaktu pawimawh Din-chhunga’n point 15 hmuin tum sarih a tisual a, Mama’n point li hlohin vawi kua a thawkchhuak.
Tuichangral tan Khawhai tlangval Saitea leh Mapuia’n point 15 leh 10 hmuin an hloh belhkhawm chu 14 a ni ve thung.
Tarlan tawh angin, nizan mipa semi-final match hnuhnung zawkah Chhinga Veng Spikers leh Hunthar intawngin, zanin hian Luangmual leh Kanan chuan hmeichhe final an khel ve leh ang.