Zanin hmeichhe final thlirlawkna

Zanin hmeichhe final thlirlawkna
Vawiin, June ni 29, 2023, Ningani zan dar 8 hian a hmun ngai R. Dengthuama Indoor Stadium, Mualpuiah Luangmual leh Kananin Tata SK 712 Pro Volley-ball League hmeichhe final an khel dawn a; Luangmualin rin hlawh zawk ni chungin khel-mual an lut ang a, Kananin an tlawm tawh-na chhanglet turin tha zawka inlan theih an inringtawk ve bawk.
June ni 22 khan khelh li ve ve chak zawn chungin league kharna’n an intawng a; set khatna an hloh hnuah Luang-mualin awlsam takin set thum an la zawn a, Nipa Barad chuan point 38 hlawhchhuakin inkhel vawi khata an hmuh tam ber a ni.
Pro Volleyball-a an tel hmasak berah Luang-mualin final an lut mai ni loin vawi ruk an khelh tawhah chiang takin an bitum an hneh vek. Hmeichhe team paruk inel zingah state pawn atanga player lalut awm chhun an ni a, Gujarat tleirawl Nipa chuan point 166 vawchhuakin 78 a hloh a, an chakna hnar pawimawh ber a ni.
2019 Pro Volleyball player tha ber Lalmuan-puii’n Nipa-i point hmuh chanve tluk lo deuh hlekin 81 a thawkchhuak a, tum 33 paih ve thungin, anni pahnih bakah Hmingtha-zuali leh R. Malsawm-tluangi’n point 43 leh 32 thawh bawkin, der-thawng loin Luangmual an chak zel.
Tun season-a chetha Kananin thawhhona leh insawrbingna thuk zawk nen kum 18 mi Nipa leh Luangmual dan theih an inbeisei ve thung a, zanin hian a vawikhatna’n an champion a nih chuan trophy pathum nen ropui takin kum an khar dawn.
Coach Eric Lalsang-liana Pautu chuan Luangmual an hneh loh hnuah kir leh tumin an inpuahchah ngawrh hle tih a sawi a, mimala innghahna tur bik nei lo mah se team pumpuiin hmasawnna an lantir theihna’n ruahmanna awmze nei nen khel-mualah an lut dawn.
“Kan hneh lo viau a, kan khelh zawn chhoh deuh avangin kan chau deuh pawh a ni mai thei. Nipa dan theih a pawimawh dawn a, a vuak dang turin player pakhat mai ni loin pahnih tal net bula kan zuan taimak a ngai ang.
“Hlap theihna hun tha a hmuh fo lohna’n lak harsa turin service kan zir ngawrh a, a nawrtu zawk nih kan tum a ni. A hma aia tha zawka kan inlan ngei ka ring a, min tantu mipui thahnem tak hmaah phurna sang zawk nen kan khel thei ngei ang,” a ti.
Luangmual laka an tlawmna kha season kal meka an inkhelh tawha Kanan chak loh awm-chhun a la ni.
Pro Volleyball bika vawi ruk an khelh tawh atangin R. Laltleipuii’n point 67 hmuin 24 a hloh a, thawhhlawk ber ni mah se Lalramliani’n point 59, Lalbiakngheti’n 49, Lalhriatpuii’n 46 leh B. Tlangmawii Varte chuan 35 an hlawh tawh bawk.