Reserve Bank of India bultumin sum vawnthat, peipun leh a kaihhnawiha mipui hriat tur tul inhrilhhriatna beihpui thlak hapta – Financial Literacy Week 2023 chu Thawhtanni khan larsap Hari Babu Kambhampati chuan Aizawlah a hawng.
-- Advertisement --
Kumin Financial Literacy Week-ah hian thupui “Good Financial Behaviour – Your Saviour” tih hnuaiah sum khawl, uluk taka sum hmanna tur duanlawk, sum lut leh chhuak tur hisap lawk tangkaina bakah digital banking service hrang hrangte tangkai zawka hman leh fimkhur dan inzirtir tum a ni.
Larsap chuan India sawrkarin tihpuitlin a duh em em chu mitin banphaka sum vawn dan tha zawk – banking services leh digital banking services chhawp a ni, tiin, kum 2013 khan National Strategy for Financial Education tlangzarh a nih thu leh hemi kum atang hian kawng tam takah hmasawnna hmuh theihin a awm tih a sawi. Kum 2014-a Pradhan Mantri Jan Dhan Yojana (PMJDY) kalpui a nih atangin mitin deuhthaw leh chhungtin deuhthaw in bank account neiin banking services an mamawh tawh a. Tunah hian mitin, chhungtin ban phakah banking services a awm tak avangin sum vawn dan tha zawk leh customer te venhimna – financial education and customer protection kawngah chak zawka hma lak a ngai tawh tih a sawi bawk.
FLC 2023-ah hian mipui tana sawrkar laipui scheme ruahman – PMJJBY, PMSBY, APY, PM-KMY, PM-SYM, leh PMMY chungchang uar taka mipui zirtir turin banker-te a chah.
Mizoram chu ziak leh chhiar tamna state a nih laiin, bank services lama hawiharh kawngah erawh a hnufual pawl kan ni thung tih Hari Babu Kambhampati hian sawiin, “Hei hi tan kan lakna tur lai a ni a, scheme tha tak tak atanga tanpuina kan hmuh turte kan hriat loh avanga kan dawn loh hi tam tak a awm a. Sum hman dan tha zawk hriat hi khua leh tuite chanvo a ni a, vawiina sum khawhral avangin hun reiloteah retheihna a thlen theih avangin sum enkawl dan dik hriat hi mitin mamawh a ni,” a ti.
Insurance scheme tha tak tak leh sum peipun dan tha zawk tam tak a awm thu te, tuna mi tam berin kan hriat chu saving account a la nih mai thu te sawiin, bankers leh sawrkar official-te tan lak a ngai a, literacy rate-a kan san theih chuan financial literacy rate pawh sang ve tur a nih thu a sawi a ni.
Larsap hian RBI buatsaih booklet – Be(A)ware chu a tlangzarh nghal a. He lehkhabu ah hian sum leh sum chungchanga inbumna hrang hrang atanga kan him zawkna turte ziah a ni.