Firfiak chet hnu thla 10-ah khualzin hmun hawng leh tan dawn

Firfiak chet hnu thla 10-ah khualzin hmun hawng leh tan dawn
Pahalgam-a mi firfiakte chetna avanga an tourism industry a chet hleih theih loh hnu thla 10-ah Jammu & Kashmir Lieutenant Governor Manoj Sinha chuan khualzinte tlawh thin hmun langsar 14-te chu hawng thuai tura tihna thupek a chhuah.
Venhimna dinhmun thlira sawiho a nih hnuah Sinha-a hian heng hmunte hi khualzinte leh tual chhung mite tan hawng thuai turin a ti a ni.
“Himna dinhmun kan thlir a, kan sawiho hnuah Kashmir leh Jammu Division-a khualzinte tlawh thin hmun, lo khar lailawk tawhte chu hawn turin thu ka pe a ni,” tiin LG Sinha chuan a sawi.
LG-in hetiang thupek a chhuah hi helai hmuna tourism sector-in nunphung pangngai a zawh leh tawh tih lantirna a ni a, nikum April atang khan nasa takin khuahkhirh a ni.
Tun tuma hmun 14 hawn thar tur nen hian khuahkhirhna avanga hmun 48 khar lailawk zinga 42 chu hawn leh a ni dawn ta a. Heng hmunhma kharte hi April 22-a mi firfiakten civil mi 26 an thah vang kha a ni a, an zinga 25 kha khualzin an ni.
Mi firfiakte chetna avang hian helai phaikuam hi mi tam takin an chhuahsan a, tlawhtu pawh an awm zui mang lo va. Hei hi heng lai vela eibarin nasa takin a tuar a, tourism industry-a innghat chhungkaw sang telin an hna an chân phah.
Sorkar hian khuahkhirhna an kalpui avanga khualzinte tlawh thin hmun an kharte chu a tahtawla hawn a tum a. June-ah hmun 16 leh September-ah hmun 12 dang hawn tum kha a ni a; mahse, tum angin thil a kal thei lo thung.
Hetih lai hian December thlaa vur tla khan khualzin a hip leh hman nual a. January thla khan thuneitute chuan khualzin nuai khat chuangin valley hi an tlawh nia sawiin thla tam tak an eibar innghahna, khualzin an neih loh hnuah an lo kir leh ta tih a lang niin an sawi.
LG Sinha-a’n hawn thuai tura a tih zingah hian Doodhpathri, Kokernag, Pir Ki Gali leh Srinagar-a Tulip Garden lar tak, Asia-a hetiang hmun lian ber te pawh a tel a ni.