FIT THUM FIT RUK

BY Dr Lalchhuanawma Tochhawng

Mi tam takin, “Mihring chanpual diktak chu fit thum fit ruk a ni mai” an ti fo thin. He ngaihdan hi khawi atanga an neih nge ka hre hauh lo mai a. Kum 1886 lamah daih tawh khan Tolstoy-a chuan “How Much Land Does a Man Need?” tih thawnthu tawi a ziak a. Kum zabi 19naah tho hian Erckmann leh Chatrian te thian dun chuan, “Uncle Christian’s Inheritance” an ziak bawk a. Heng thawnthu pahnih te hi “fit thum fit ruk” tawngkam lo chhuahna an nei thei mai awm e.
Tolstoy-a thawnthu hi tunhma khan Mizo tawnga lehlin a awm niawmin ka hria. A thawnthua changtu ber Pahom-a chu a ram duh zatah a duham lutuk a, a thih phah a, a chhiahhlawhten fit ruka sei ramah an phum ta a.
Erckmann-Chatrian thawnthu hi chu a tawp lam tlem letlingin kum 2015-ah khan Fb-ah ka post zauh tawh a. A changtu, a thawnthu sawitu ni bawk Casper Haas chuan a pami Christian-a in leh lo zau tak a rochung a. Zanah tukverh atanga pawn lam a han hawi chu, thlarau rual hian thlanmual an pan thluai thluai mai a. A tawp berah a pami thlarau chu a lo hawi let a, “Casper, Casper! Lo kal ve thuai rawh. I mamawh ram chu fit ruk mai a ni e,” tiin a rawn hui a.
“Fit thum fit ruk” lam ritu nazawng hian a chunga kan thawnthu tarlante khi an chhiar ka ring lo va. An ngaihtuah zui pawhin ka ring chiah lo.
Fit thum fit ruk hi mihring mamawh leh a chanvo emaw a chanpual emaw a ni lo. Mihring tling tawh lo, mitthi ruang chanpual a ni. He tawngkam hi intawng khum nan phei chuan hman hauh loh tur a ni. Tolstoy-a thawnthua Pahom-a pawh fit ruka thui leiah an phum chhan chu, a thih a, mihring a tlin tâk loh vang a ni a. Erckmann-Chatrian thawnthua, “I chanpual chu fit ruk” titu pawh mihring tling tawh lo thlarau mai a ni. “Fit thum fit ruk” hrim hrim hi heng thawnthu pahnih tarlan tum ber a ni lo.
Mizo pa chuan a nupui chungchang, “Mihring kan tling ta lo,” lungchhe takin a lo ti a. “A thi ta,” a tihna a ni. A taksa chu a la awm reng, mahse amah timihringtu khan a chhuahsan tawh. A taksa chauh a awm tawh a; kawl reng theih a ni tawh lo. Hnam thenkhatin an phum a; thenkhatin an hal ral a; thenkhat chuan mulukawlh an eitir a; thenkhat chuan thing sang takin emaw, lungpui lian tak chungah emaw thangte dawhin an zalh mai bawk.
Mitthi suna kan lungchhiat chhan te, an taksa ringawt pawh kan lainat chhante hi mihring an la nih laia kan intawn vang leh kan inzawm vang a ni. Run lui kamah khian Liandova te unau hun laia mi pakhat ruhro lai chhuak ta ila. Science thiamna hmangin engtin tin emaw kan chhungkaw thlahtu tih finfiah thlap ila; ruhro chu a hmunah han hmu ngei bawk ila; kan sun hauh lo ang a, kan mittui a tla hek lo vang. Kha ruhro kha mihring a nih lai kan hre phak lo va. Mihring a nih hun leh mihring ka nih hun a inhlat lutuk a; lusun rilru min puttir thei lo. Sun chiam ila mi nuih ka tiza a nih loh pawhin mak tih ka hlawh hle ang. Mitthi ruang hi engati nge zah taka kan sawngbawlt Mihring a lo nih tawh thin vang a ni. Mihring ni ngai reng reng lo sakhi tlaw chu kan en dan a dang daih.
Mihring hi, a taksa ringawt chu ramsa taksa ang mai a ni a, thisen leh ruh, tisa leh vun a ni a. Mahse amaha mihrinna awm erawh chu ramsa nen khaikhin rual a ni lo. Chu mihring chuan mamawh a nei a, a mamawh chu fit thum fit ruka khung len theih rual a ni lo. Dam lo khum beta na pawh ni se a mamawh chu fit thum fit ruk huangah a leng thei lo. A mamawh thil chu a chanvo tura khuarel dan leh ram danin a ruahman nen a inzawm tlat bawk a ni. Chung a chanvo te chu mihring a nih avanga a chanvo ve reng an ni a; lak bo sak mai mai a thiang lo. Tunhma khan phaiah mi pakhat chu khaihlum tura thiam loh chang a awm a. An khaihlum hma zanin a dam lo a, amah enkawl turin daktawr an ko a, daktawrin a enkawl ngei a ni. “Darkar riat emaw lek hnua khaihlum mai tur a ni a. Dam lo mai mai rawh se,” tih theih a ni lo. A la thi lova, mihring a la nih tlat avangin mihring a nihna anga a chan pual tur, damdawi lam inenkawlna kha fit thum fit ruk piah lam daih atangin an koh sak thlap a ni.
Mi tupawh hi, fit thum fit ruk bawm chhungah a thih hmain khung bet ta reng mai ila, human right dan kalhin kan che tihna a ni. Tisa leh thisen nei a nihna angin mamawh leh chanvo a nei a; rilru leh thlarau nei a nihna angin a rilru leh thinlungin mamawh leh chanvo a nei bawk a. Chungte chu mihring a nih avanga a mamawh leh a chanpual(rights) an ni.
Mihring hi mihring kan la nih chhung chuan khuarel leh Pathian danah chanvo kan nei a; chumi behchhan chuan sawrkar dan hnuaiah chanvo kan nei a. Kan mamawh leh kan chanvo hi fit thum fit rukah engtin mah kan khung seng ngai lo vang. A kaihhnawihah hian zawhna pawimawh tak tak kan ngaihtuah tur a awm.
Eng nge kan mamawh bulpui? Kan mamawh nia kan hriatte hi a pawimawh dan indawtin kan rem thiam em?
Pahom-a angin, mihring hian dinhmun sang zawk neih chakin chet a thawh reng a; mahni hmasial takin ram leh khawvel a thlir fo thin. A thil thlir dan chu ama tana tha zawngin a sawi mâm fo bawk. Chuvangin a mamawh leh a chanvo chungchangah hian amah leh amah hi thutawp siam tura dah fal chi a ni lo fo thin a ni.
A chanvo tur nia a ngaih kha a chanvo tur a ni tak tak em?
Chanvo dik lo chan a tum em? A hausakna chhuangin a chanvo tur bâk chan a tum emt A retheihna chhuanlamin a chanvo ni miah lo chan a tum em?
A chanvo tur dik tak, sawkar dan leh khuarel danah a chang phâk em?
Vantlang mi a nihna angin vantlang chanpual a nei tha tawk em?
A chanvo a chan theihna daltu an awm emt Awm se a chanvo sual chhuak turin a huaisen tawk em?
Heng zawhnate hi eng angin nge kan chhan thin tih hian kan ram dinhmun a hril thui em em a; zawhna pawimawh tak an ni kumkhua dawn a ni.