Forensic- DNA thiamnaah lawmman la
April 7 &8 khan Forensic Science Laboratory Patna-ah Satellite Conference (SetCon) on Forensic Biological Sciences neih a ni a. India rama forensic, DNA-a thawkte tana a buatsaih Best Oral Presentation (Professional Category) ah Mizoram aiawhin Forensic Science Laboratory Mizoram assistant director Ammie Lalnunpuii chu pahnihna a ni.
He conference-ah hian abstract 47 a lut a, a tha zual 18 thlante chuan conference chhungin presentation an nei. A tha zual 18 zingah hian Ammie Lalnunpuii abstract hi thlan tel niin, presentation a neih atangin ti tha ber dawttu (pahnihna) a thlan a ni.
Conference-ah hian India ram chhunga forensic lama mithiam, state leh central Forensic Science Laboratory atangin mi 150 vel an tel a ni.
SetCon Conference hi FSL (CID) Patna Bihar leh sawrkar laipui Ministry of Home Affairs hnuaia Directorate of Forensic Science Services (DFSS) New Delhi tangdun buatsaih a ni a. Lawmman hi Bihar chief secretary Arvind Kumar Chaudhary leh DFSS director cum chief forensic scientist Dr SK Jain ten an hlan a ni.
Mizoram Forensic Science Laboratory-ah hian forensic expert 14, director T Lalropuia hoin an awm mek a. Mizoram FSL hian fingerprint thiamna hmangin India ram pumah lawmman kum 2017 leh kum 2023 ah a lo la tawh a, tunah hian DNA-ah a ti tha ber pahnihna a ni leh ta a ni.