Forest Act chungchanga Official Resolution kha

Tun Assembly Session neih zawh taka Official Resolution pawm tak kha, kan hriat angin kum 2023-a Parliament-in Danpui a siam that “Forest Conservation (Amendment) Act, 2023” hnuaia section thenkhat [Section 2, sub-section (i)], Mizoram sawrkar hmasain a lo dodal tawh chu, sawrkar thar chuan he dan hi ‘Mizoram chhungah a hman theih e’ tiin a pawm ta a; sawrkar hmasa tanfung kha a rawn thiat/sut ta a ni.
He resolution hian Assembly Session zawhfel a nih hnuah pawh social media lamah sawi zui a hlawh chho mek a. India danpui hnuaia special provision inang kan neihpui Nagaland-in FCAA a dodal dan chungchangte pawh social media lamah hian a darh chuai chuai a, Mizoram nen khaikhin a hlawh mek a ni.
Kha official resolution sawihonaah khan, a tawp khartu House Leader khan 371G hmang hian ‘kan pawm lo thei em tih hi inhnial theih tak a ni’ tiin a sawi a. State kan nih hmaa Central Act Mizorama applied tawh kha chu apply zui zel tur a ni a, sawi theih kan nei lo tiin a sawi a. Chutih laiin, state kan nih hnua central Act, kan special provision 371G nena inkalh nia kan hriat erawh chu kan dodal thei a, kan pawm lo thei, a ti a. Amendment an rawn siam hi 371G hmang hian kan pawm lo thei em tih hi inhnial theih tak a ni, la zir chian tlan a tha, kan mithiamte pawh kan la ruai ang… tiin a sawi bawk.
Helai tak hi hriatthiam har deuh chu niin a lang. He official resolution hi zirchian la ngai tak nia sawi a nih lai hian, adopt turin House-ah put luh a ni lawi bawk si a. House Leader-in a sawi zelnaah, sawrkar hmasa pawh khan he Amendment dan dodalna reolution kha ministry-ah a lo thlen bik lo va, a chhan pawh Notification leh Guidelines te a lo chhuah hnuah an zirchiang a, dodal chi a ni lo tiin an umzui ta bik lo… tiin a sawi a; a thusawi hi rawn hnial kalh an awm hran lo.
Hetih rual hian, House Leader hian FCAA hmang hian state-in thuneihna sang zawk kan neih phah, forest clearance pek chungchangah tih theih nei mang lo kha, tunah chuan thui tak thuneihna kan neih phah… tiin a sawi ve thung.
Chutih laiin, resolution chu an duhthusam a nih bik loh thu a sawi lawi a; a lo tha lo a nih chuan kan thu hi kan sut leh thei tiin, ‘han hmang ve phawt ila’ a ti a, Notification leh Rules zirchian ngai angin a sawi bawk.
Khai le, kan ram rorel khawlin mipui aiawha thutlukna an siam chu mipui lamin kan lo hmuin kan lo hre ve ta a. Ngaihtuahna an seng nasa a, an hahpui a, a tha ber nia an hriat angin mipuite min kaihruai mek a ni.
Hetih lai hian, kan legislator-te hian zirchianna hun an nei nia a lan laia ‘zir chian ngai’ ti chung sia resolution an pawm mai thin hi chu, ‘an kalpah deuh thin em aw’ a tih theih. Mizoram inrelbawlna Dan siam tura mipui aiawha thlan chhuah (Legislator) an nih ang ngei hian Dan siam chungchang hi chu tun ai hian ngai pawimawh lehzual thei se. A changa ‘pawm’, a changa ‘pawm lo’, a changa ‘pawm leh’ ti reng renga awm ngai lova, a tir phat atanga ngunthluk taka zirchian ngai chu zirchiang phawt thin turin inbuatsaih sauh sauh se kan va ti em! Mipui lam chuan…!