Forrest in last 16 an lut

Ningani zan khan UEFA Europa League Knock-out round play-off second leg khelh a ni a, an muala tlawm chungin English club Nottingham Forrest chuan last 16 an lut. Nottingham Forrest rual hian VfB Stuttgart pawhin last 16 an lut ve bawk.
Nottingham Forrest hian mikhual an nihna hmunah Turkish club lian Fenerbahce hi 3-0 in an lo hneh tawh. Mikhual an nihna hmunah 3-0 ngawta an chak vangin an dinhmun a tha viau tawh. Dinhmun tha taka ding chungin an mualah inlan mah se an chesual teuh viau thung a, an tualzawlah ngei 2-1 in an tlawm. An muala tlawm chungin last 16 erawh an inhlangkai tho thung.
An mualah 3-0 ngawta tlawm tawh Fernerbahce hian mikhual an nihna City Ground ah chak ngei tumin tan an khawh a, goal hnih thun hmasa in an khel tha hle nghe nghe. Turkish club lian tan hian Kerem Aktürkoglu chuan minute 22-naah hmahruaina goal a thun. Hmahruaina goal an thun hnuin second half tir lamah an chefuh nawn leh a, penalty an hmu. He penalty hi goal hmahruai thuntu Kerem Aktürkoglu chuan pet goal in goal hnihna a thun zui leh. Si hniha hma an hruai vangin last 16 luh theih beiseina an nei sang hman hle.
An mualah goal hnih an chhuah zawn hnuin Nottingham Forrest an insiamtha a, goal thun ngei tumin tan an khawh. Dinhmun him lo taka an din vanga tan khawh thar Nottingham Forrest tan hian Callum Hudson-Odoi chuan minute 68-naah goal thunin an si phurh a sut. Hudson-Odoi goal thun hnuin goal dang a luh belh thei tawh lova, an mualah tlawm mah se Nottingham Forrest hian an khingpui Fenerbahce chu si belhkhawmah 4-2 in an hneh a, in last an lut ta a ni.
Nottingham Forrest ang tho hian German club lian VFB Stuttgart chu mikhual Celtic hneh lovin an tlawm a, an muala tlawm chungin Stuttgart pawh hian si belhkhawmah 4-2 tho a chakin last 16 an inhlangkai ve bawk.
Scottish club lian Celtic hian mikhual an nihna hmunah bul an tan tha viau a, inkhel tan atanga minute khatnah lekah Luke McCowan hmangin hmahruaina goal an thun nghal. Hma taka goal an thun vangin an phur viau a, an si phurh sut zawh tumin tan an khawh zui nasa hle. An muala si an lo phurh tawh zawng zawng sut zawh tum bawk mah se hun tawp thlengin goal an thun belh thei tawh lo va, last 16 lut zo lovin an tla zui ta a ni.
Inkhel dangah Italian club Bologna chuan Mimualah 1-0 a an lo hneh tawh SK Brann chu 1 – 0 bawkin an hneh nawn leh a, si belhkhawmah 2-0 a hnehna changin last 16 an inhlangkai a, champion thei turin hma lam an pan. Bologna rual hian Racing Genk chuan si belhkhawmah 6-4 in Dinamo Zagreb an hneh bawk.