France leh Portugal an tlang

Thawhtan zan khan Euro 2024 last 16 khelh chhunzawm a ni a, team lian pahnih; France leh Portugal ten hnehna changin quarter-final an lut. France leh Portugal te hian semi-final luh an inchuh zui leh ang.
France an vannei
Euro 2024 ah beiseina sang tak nena inlan, beisei anga khelchhuak zo ta lo France hian team lian zinga mi Belgium an hmachhawn a, own goal hmangin hnehna an chang a, vanneihthlak takin quarter-final an lut. France ang tho a beisei phak lo Belgium chuan Euro atangin an puanthuah an tel ta nge nge.
France leh Belgium te hi Düsseldorf Arena-ah an inhmachhawn a, an inhlauhtawn em vangin inkhel hmuhnawm an lantir thei lo. France manager Didier Deschamps chuan an that dan ber tur zawng kualin formation thar a hmang a, 4-1-2-3 formation hmangin a player te a rem. Tlarhnungah Kounde, Upamecano, Williams Saliba leh Theo Hernandez a rem a. Defensive midfiel-ah Tchouameni dintir in Tchouameni hmaah hian N’Golo Kante leh Adrien Rabiots te an inkawptir a. Tlarhmaah Marcus Thuram, Kylian Mbappe leh Antoine Griezmann a inkawptir bawk. Formation dang a hman aiin a thatpui hluaina leh a chhiatpui tak viauna sawi tur a awm hran lo.
Beisei phak lo tak, Slovakia hneh lova tlawm nghal Belgium manager Demenico Tedesco chuan mual laiah France dan chah a pawimawh tih a hrechiang a, 4-4-2 formation a hmang ve thung. Tlarhmaah Ikoma Lois Openda leh Romelu Lukaku a dah a. Inelna neih meka vanduai Lukaku hi hmuh tur a awm lo tluan a ni deuh ber. Hmunawl an hmuh ve leh rang taka nawr let thui thei turin Jeremy Doku leh Yannick Carasso te a sirah a dah bawk. Ball chang tlem zawk leh goal hlauhawm nei tlem zawk ni mah se Belgium hian goal an thun hmasa teuh hle.
Inkhel hmuhnawm tia sawi hluai tur ni loah hian France in goal thun theihna hun tha an ngah zawk a, an pet sang hret zel thung a, uiawm takin an hun tha an hlah zauh zauh. Belgium tan Kevin de Bruyne chuan chance a nei zauh a, si nghak chetha tak Mike Maignan a paltlang zo lo. Langsar lo tak Lukaku pawhin hlauhawm a siam zauh naa Maignan a pal tlang thei bik lo.
Team lian pahnihte inkhelah hian goal lut a awm thei dawn lo emaw tih hnuah France in goal an thawkchhuak. Minute 85-naah Marcus Thuram pet chu defender Jan Vertonghen chuan an lamah vanduaithlak takin a dang lut a, France hmahruaina goal a thunsak. Hma an hruai hnuin France in an tlarhnung an veng nasa leh zual a, Belgium in an nawr tlang thei tawh lo. France hian hun tawp thlengin an hmahruaina an humhim tluan a, Portugal hmachhawn turin quarter-final an lut.
Portugal chakpuitu Costa
France leh Belgium an inkhelh zawh hnuin team ngaihven hlawh Portugal leh Slovenia te chu Frankfurt Arena-an an inhmachhawn. Inkhel hmuhnawm takah hun pangngai leh extratime-ah goal lut a awm lova, inelna neih mekah a vawi khat nan penalty shoot out hmanga chak zawk zawn niin si nghak chetha tak Diogo Costa chuan a team a chakpui a, Costa hi chhanhimtu ropui a ni.
Portugal manager Roberto Martinez chuan Georgia an hmachhawn tuma formation a hman 3-4-3 thlak danglamin Turkey an hmachhawn tuma a formantion hman 4-2-3-1 a hmang nawn leh a, Cristiano Ronaldo chu target man a ni. Slovenia hian Portugal in an nawr na dawn tih an hria a, 4-4-2 formation hmangin dan chah an lo tum ve thung. An inkhel hi hmuhnawm pangngai viau mah se team hnihte an hlauhawm tawk lova, hun pangngaiah han phut zawk zawkna tur a tam hran lo.
Hun pangaiah chak zawk an awm theih loh hnuin extra time a hmuhnawm zual a, team hnihte chak theihna hun tha an nei ve ve. Portugal in chak theihna hun tha an nei hmasa a, penalty an hmu. Jota penalty hlawhchhuah chu minute 105-naah Cristiano Ronaldo chuan a pet a, a pet goal lo. Euro a goal thun hnem ber Cristiano Ronaldo pet hi chhe lem lo viau mah se Slovenia si nghak Jan Oblak chuan pui zetin a lo dang a, an team a chhanhim.
Oblak penalty dan hian Slovenia a fuih phur thar a, hun tawp dawp tepah goal thun theihna hun tha an nei. Minute 115-naah Euro a player upa ber Pepe chuan tihsual pawi tak a nei a, ho takin ball a chhuah. Pepe tihsual a vang hian Benjamin Sesko chuan ball a khalh tlang a, goal thun theihna hun tha zet a nei. Forward ngaihven hlawh Sesko hian si nghak Costa chiah hmachhawn tawh mah se goal a thun thei lova, uiawm zetin a hun tha a hla a, Costa chuan pui zetin Portugal a chhanhim.
Sesko-a’n a hun tha a hlah hnu hian hlauhawm awm tam tawh lovin inkhel a tawp a, tie-break hmangin chak zawk zawn chhunzawm a ni. Slovenia chuan penalty an pet hmasa a, pet hmasa ber Josip Ilicic pet tha tak chu si nghak Costa chuan tha zetin a dan sak. Slovenia in an thelh hnuin Portugal tan Cristiano Ronaldo a lo penchhuak a, hun pangngaiah penalty thelh mah se Ronaldo hian a thelh nawn tawh lova, chiang takin a pet goal. Slovenia tana pettu pahnih; Jure Balkovec leh Benjamin Verbic te pet chu si nghak Conta-a’n a dang leh ve ve a. Portugal tan Bernardo Silva leh Bruno Fernandes ten an pet goal thung a, Portugal hian 3-0 a hnehna changin, quarter-final an lut zui ta a ni.
France leh Portugal te hi semi-final luh inchuhin zirtawp zan lai dar 12:30-ah an inkhel ang, inkhel hmuhnawm tak a ni ang.