Hnehna nena bul tan Osaka

Kum 2019 hnu lama Wimbledon inelna a hmachhawn leh vawikhatnaah Naomi Osaka chuan Thawhtanni khan court two-ah 6-1 1-6 6-4-a Diane Parry hnehin women’s singles second round a lut a, American 19th seed Emma Navarro a hmachhawn zui leh ang.
Wimbledon main draw-a vawili inlan tling ta Japanese kum 26 mi hian kum nga chhunga a vawikhatna’na Wimbledon a khel leh thei chu mumang ang mai a nih thu sawi chungin, “Ka phur takzet a, a hlimawm ngawih ngawih. Wimbledon hi nau ka pai hnua ka tournament thlir hmasakber niin, naktuk hian ka fanu pawhin kum a tling ve chiah dawn a, he hmuna ka inlan thei hrim hrim hi ka hlimpui thin,” a ti.
Vawili lai Grand Slam champion ni ve tawh Japanese Osaka hian kum khat liamta khan a fa hmasaber ni turin fanu Shai a khung a, kuminah inelna hmachhawn leh turin khelmual a rap leh tan a, mahse, a chawlh rei avangin ranking lamah 113-na a ni duai tawh a, London tournament lian pawh hi ngaihnathiamna leh duhsakna (wildcard) hmanga khel thei chauh a ni.
Kum 2022 khan hliam avangin grass-court grand slam hi a khel thei lo a, 2021 tournament pawh kha rilru lama harsatna a tawh avangin a inlan tawh lo bawk.
Kum nga ngawt a kalbo hnua Wimbledon match a khelh leh vawikhatnaah French world number 53 Parry lakah hnehna chang nghalin, SW19 bika third round la pel zo ngai lo khan second round a lut ve leh ta phawt a, kumin hian Wimbledon-a a thlensan ber round thumna lut turin Navarro a paltlang phawt a ngai dawn a ni.
Thawhtanni inkhel dangah kum 2019 leh 2021-a Wimbledon fourth round lo thleng ve tawh Coco Gauff pawhin 6-1 6-2-a a chipui American Caroline Dolehide sawp chungin second round a lut ve bawk.
Kum nga kalta khan tleirawl kum 15 mi lek ni chungin chutih laia world number 313-na Gauff chuan Wimbledon-a inhnehna hmingthang thlentirin vawinga champion tawh Venus Williams a hneh a, tuntumah erawh world number two leh reigning US Open champion ni chungin a la thlensan ngai lohna London grand slam tournament a khel a, nikumah phei chuan first round paltlang zo lo mah se beiseina a nei tih a sawi.
Kum 20-a upa Gauff hian minute 64 chhunga a chipui a hneh hnuah Romanian qualifier Anca Todoni chu second round-ah a tum leh ang.
French Open runner-up Jasmine Paolini, ninth seed Maria Sakkari leh Eastbourne champion Daria Kasatkina-te pawh first round paltlang zingah an tel a, Chinese eighth seed Zheng Qinwen erawh 4-6 6-2 6-4-in New Zealand qualifier Lulu Sun lakah a tlawm thung.
Russian tleirawl Mirra Andreeva pawh rin loh taka chak lo zingah telin, 24th seed hi world number 88 Brenda Fruhvirtova chuan 1-6 6-3 6-2-in a vawtla.
Kan hnung lawk Roland Garros khelh zawh taka world number one Iga Swiatek laka tlawm seventh seed Paolini chuan 7-5 6-3-in Spain nula Sara Sorribes Tormo a hneh a; kum 28 mi Sakkari pawhin world number 119 McCartney Kessler of US lakah 6-3 6-1 hnehna a chang.
Greek world No. 9 Sakkari hi major singles a khelh hnuhnung vawirukah vawinga first round paltlang zo loin a tla a, kumin Wimbledon-ah erawh 2nd round a lut hlawl!
Spaniard Paula Badosa pawhin 6-3 6-2-in French Open champion hlui Karolina Muchova a paltlang a; Muchova hi hliam avanga thla 10 zet a chawlh hnua Grand Slam tournament rawn khel leh chauh a nih avangin ngai a la awh lo deuh niin a lang.
Match dangah Kasatkina chuan 6-3 6-0-in Zhang Shuai of China a sawp ve bawk.
Thawhtannia inkhel tur dang third seed Aryna Sabalenka erawh dar hliam avangin a inhnukdawk thung.