France sorkar ruahmanna kal tlang thei

France sorkar chuan pension age kum 64-a a tihsan avanga no-confidence vote a hmachhawn chu beitham takin a paltlang hlauh a.
Pension kum tihsan avang hian Paris khawpuiah chuan lungawilohna nasa tak lantir niin mi 101 manin an awm phah tawh a.
No-confidence vote hi centrist MP tena an kalpui niin vote 278 an hmu a, paltlang tura vote hmuh ngai 287 chu an pha lo deuh a ni.
Hlawhtling ta hlauh se chuan President Emmanuel Macron chuan sorkar thar a siam emaw inthlan that emaw a ngai dawn thung a ni.
No-confidence motion pahnihna pawh kalpui zui niin hei erawh marine Le Pen party far-right National Rally party te kalpui ni thungin hei pawh a hlawhtling chuang lo bawk.
|um hnih lai vote thlak hnua a tlang loh ve ve vangin sawisel hlawh pension kum 62 atanga 64 a tihsanna tur chu dan a ni dawn ta a ni.
Hetianga vote lak hial a ngaihna chhan hi Prime Minister Elisabeth Borne in parliament a pharh lova bill chu special constitutional power, Article 49:3 hmanga a kaltlang pui vang a ni a.
Kar kalta khan France ramah chuan he bill duhlohna hi liantham taka kalpui niin central Paris-ah phei chuan lungawilohna lantirna a nasa zual a, khawpui hrang hrangah pawh lungawilohna lantirin a awm a ni.
Vote lakah sorkar zawk a dinchan hnuah pawh left-wing member te chuan placard ‘kan chhunzawm reng dawn’ tih te leh ‘kawtthlerah kan inhmu ang’ tih te chu keng langin prime minister chu a bang tur a ni tiin an au bawk.
“Engmah chinfel a la ni lo va, he reform hi hnuhkir a nih hma chuan kan theih tawpin hma kan la zui zel ang,” tiin hard-line La France Insoumise parliamentary group chief Mathilde Panot chuan a sawi.
University zirlai pakhat Shola chuan, “Pension kum tihsan hi kan tan pawina awm lovah an ngai mai thei a, a ni hauh lo. Kan pi leh pu te hun rei zawk hna an thawh a ngaih chuan thil a dik dawn lo tih kan hria a ni,” tiin a sawi.
Zirlai tho Maries chuan, “Thlauhthlakin kan awm a, hnawlin kan awm a, he sorkar hian engahmah min ngai lo, min nuihzat a ni,” tiin a sawi bawk.
Macron thung chuan France-a kum upa pung leh tam mek zel te avangin pension scheme kalpui mek chuan a dawlzo tawh lo tiin a sawi a, mahse, a ngaihdan chu parliament ah pawmpui a ni lem lo thung.