Free Clinic nei, nei leh lo

By-election neihna tur Dampa bial khaw pahnihah adviser to chief minister (health & family welfare) Dr Lorrain Lalpekliana Chinzah-in free clinic a nei tiin an party-in an puang a, a hnu lawkah a nei leh lo tih an puang leh. Social media lamah khelh zui a hlawh nghal.
October ni 18-a ZPM thuchhuaha a lan dan chuan, Dr Lorrain-a hian free clinic a nei a, October ni 17 chhun leh zanah khan Parvatui, West Phulpui, Pukzing leh Pukzing Vengthar khuate a tlawh tia sawiin, “Dr Lorrain chuan Parvatui leh West Phulpui khuaah hian a mamawh apiangte tan ‘Free Health Clinic’ a buatsaihsak a, dam lote enin a thlawnin damdawi a pe bawk a, mipuite’n an hlut hle,” an ti.
PHC a tlawh thu thlengin an ziak a, “Dr Lorrain hian Phuldungsei PHC pawh tlawhin thawktute nen an inkawmho a, an mamawhte an lo thlente a theih anga bawhzuisak a tum thu a hrilh,” an ti. Thlalak an thehdarh bawk.
A hnu lawkah ZPM hian thuchhuah dang an siam a, “Ni 18.10.2025 Local Cable TV thenkhat Chanchin thar, tualchhung chanchinah Dr Lorrain Lalpekliana Chinzah, Adviser to CM-in ni 17.10.2025-a Mamit District khaw thenkhata Free Health Clinic buatsaih anga puan chu thu hriatsual vang a ni,” an ti.
“Dr Lorrain-a hian khaw pahnih a fannaah dam lote’n an harsatna an lo sawite chu endikin a theih angin a lo tanpui a, damdawi a kawl remchan angte a lo pe a ni,” an ti a, an party-in free clinic nei anga an lo chhuah chu pawi an ti nia sawiin, “… tihdikna kan rawn siam a, election thuneitu te, press mite leh mipuite hriatthiamna kan dil a ni,” an ti.
Hetih lai hian amah Dr Lorrain-a hian facebook-ah free clinic a nei ni awmin a lo sawi thung a, “Nimin October 17, 2025 (Zirtawpni) khan Parvatui, West Phulpui, Pukzing leh Pukzing Vengthar te tlawhin hun kan hmang a, A mamawhtu apiangte tan ‘Free Health Clinic’ kan buatsaih bakah, dam lo mi harsa zualte tan a thlawnin damdawi engemaw zat kan pe bawk a, mi tam takin an dampui ngei ka beisei a ni,” tiin a post a ni. An party thuchhuah hmasaah free clinic neihna khua hi Parvatui leh West Phulpui chauh an tarlan laiin amah MLA chuan heng khaw pahnihte bakah Pukzing leh Pukzing Vengthar te a sawi tel.