French Football president a bang

French Football president a bang
Kum 81 mi Noel le Graet chuan French Football Federation president a nihna a bansan chian thu Thawhlehni khan a puang.
Noel le Graet ban chhan hi hur sualna kawnga inthlahdaha puh a nih vang niin, amah chuan tihsual a neih loh thuin an puhna a pha hul a, mahse, a telna pawl tihming-chhiaa ngaih a ni a, French sawrkarin federation an audit zui bawk a; January thla khan a hna chelh lai chu a tawpsan tawh a, tunah FFF enkawl tura kirleh tumna a neih loh thu a nemnghet ta a ni.
FFF member engemawzat chuan Fifa lama a nihna chelh lai a chhunzawm tur thu an sawi.
January 2022 khan Le Graet hi Paris khawpuia Fifa office thara Fifa president Gianni Infantino aiawhtu atan ruat niin, he mawhphurhna hi chu a chelh zui rih phawt rin a ni.
Kum 11 chhung FFF office luah tawh Le Graet hi kum 2024 thleng French Football Federation president hna la chelh tur a nih laiin mipat hmeichhiatna kawnga midang chhaihbuai (sexual harassment) thubuaiah a awk a, amah chuan an puhna pha bawk mah se a president nihnain a tuar zui ta tho a ni.
Hursualna chungchanga a tawngkam sumkar loh piahlamah France thuam inbel chunga World Cup leh Euro title hawn tawh Zinedine Zidane laka a tawngkam cheh dan avangin bang tura nawr a lo ni tawh bawk.
Le Graet hian Real Madrid tana Champions League title pathum a zawna hawn tawhtu Zidane hi France coach hna chelh chungchangah a thlawp lo a, phone-in Zidane hian lo bia pawh ni se phone a chhan loh tur thu a sawi a, a hnuah a thusawi atthlak zet avang khan thupha chawi bawk mah se mi ngei a hlawh phah ta tho a ni.
Hurna lam hawia hmeichhia a tihbuai thawm a rikchhuah hnuah nikum October thla khan French sawrkar chuan FFF endik hna an kalpui a; tunkar Thawhlehnia an president-in a ban thu a puan hnu lawkah FFF lamin sport huang leh sum lama Noel le Graet-a’n pawl tana hna ropui a thawh tawhte an hriatpui thu an tarlang ve nghal.
Thawhlehni vek khan French sports daily L’Equipe chuan Le Graet an kawmna tichhuak ve nghalin, tah chuan Le Graet hian a ukilte’n amah leh an pawl chhe taka puhtu sports ministry report an khinlet tur thu sawiin, mi tumah a chhaihbuai ngai loh thu a tarlang tel.
Kum 2011-a office luah tan Le Graet-a hnuaiah France men’s national team chuan 2018 World Cup hnehna changin, Euro 2016 leh 2022 World Cup-ah runners-up an ni bawk.
Kumin kumtir lama a hna a chawlhsan hma khan Zidane hnawltu nia ngaih Le Graet hian France manager Didier Deschamps-a contract chu kum 2026 thleng awh turin a pawhsei sak hman.
A ban hlen tur thu a puan hnuah vice-president Philippe Diallo chuan kumin June thla thleng interim president hna a chelh zui dawn a, kum chanve hnu hian a thlaktu nghet an thlang chauh ang.
France hian kumin nipui thawt tawp lamah Women’s World Cup an khel dawn a, president hna chelh lailawk Diallo chuan an hmeichhe team head coach Corinne Diacre hmalam hun an tihchian thuai tur thu a sawi.