French Open champion Carlos Alcaraz

Tennis a inelna lian zual Grand Slam pali zinga Clay Court-a khelh awmchhun French Open 2024 chu pathianni zan khan khelh zawh a ni a. Final hmuhnawm takah Carlos Alcaraz chuan Alexander Zverev a lehthal a, ropui takin a champiom. Rolland Carros lal thar Alcaraz hian Grand Slam pathumna champion thei naupang ber record thar a siam.
Final ngaihven hlawh takah rin lawk ang ngeiin World No. 3 Carlos Alcaraz-a’n bul a tan tha viau. Alcaraz hian set khatnaah break nei zawnin, game thum chiah a hloh a, awlsam takin set a la.
Set hmasa a hloh hnuin Olympic champion Zverev a insiamtha a, set hnihnaah tha chungchuang takin a khel. German 4th seed Zverev hian break nei zawnin game hnih chauh a hloh a, awlsam takin set a la. Set khat ve ve an lak hnuin inkhel a hmuhnawm leh sual sauh. Set thumnaah an inbeitawk viau. Set thumna tir lamah Alcaraz-a’n break a nei a, 5-2 ngawtin hma a hruai hman. 5-2 a hma a hruai hnuin a serve zui a, awlsam takin set a lak belh ngei tura ngaih a ni. Dinhmun chhe taka a din laiin ropui takin Zverev a inlan a, boruak sang takah break a nei zawn a, game nga ngawt a la zawn ta mai a, set la in, 2-1 in hma a hruai let ta daih.
Olympic leh inelna lian danga champion tawh, Grand Slam-a champion mamawh tak Zverev hi set hnih a lak hnuin ngai a awh lo teh tlat a, thahrui ngah lamah a khingpui a khan lo sawt hle. Trophy hnaih hman viau mah se set lina atangin a talbuai teh tlat a, a serve a hum hleithei tawh lo. Set linaah hian Alcaraz-a’n Zverev a break vek a, Zverev hian vawi khat break let ve bawk mah se game khat bak a la thei ta chuang lo a, set a hloh chiang hle.
Set hnih ve ve an lak hnuin deciding set-ah Alcaraz-a’n bul a tan tha leh viau a, break a nei leh nghal. Zverev hian 0-40 ngawta hmahruaiin, break let theihna hun tha zet nei mah se a chhawr tangkai zo lo. Break let theihna hun remchang a neih ang pawh a chhawr tangkai zawh loh zel bakah a serve a hum zawh loh zui leh bawk vangin thahrui ngah, Sakawr patuai ang maia lim zek zek reng Alcaraz chu a hneh zo ta ngang lo a. Thahrui ngah zawk leh huaisen zawk Alacaraz chuan 6-3 2-6 5-7 6-1 6-2 a hnehna changin French Open champion thar a ni ta a ni.
Rolland Garros lal thar Carlos Alcaraz hi French Open-a champion hmain US Open leh Wimbledon-ah te a lo champion tawh a, mipa zingah Worl No. 1 ni thei naupang ber a lo ni tawh bawk. French Open final a luh khan mipa lamah Grand Slam chi hrang pathuma final lut thei naupang ber record thar a lo siam tawh a. French Open-ah a champion zui leh tak vangin Grand Slam pathuma champion thei naupang ber record duhawm tak a siam zui leh ta bawk. Alcaraz hi a thahrui a tha em em a, a huai bakah thiamna ril tak a nei bawk a. Tennis khawvelah a hming a thang mawi deuh deuh tura ngaih a ni. French Open-ah a champion hnuin Alcaraz hian Eifel Tower tatoo thar neih ngei a tum thu a sawi.
French Open hi Spain player te tan hmun duhawm a ni ve hrim hrim. Rafael Nadal chu ‘Clay Court lalpa’ tih hial a ni a, French Open-ah hian vawi 14 zet a champion. Kum 1993 hnu lamah French Open-ah hian Spain mi Sergi Bruguera, Carlos Moya, Albert Costa, Juan Carlos Ferrero, Rafael Nadal leh Carlos Alcaraz te an lo champion tawh a. Kum 32 chhunga French Open trophy 32 zinga 20 zet chu Spanish kutah a tlu lut hial a ni. Paris khawpui hian Olympic 2024 a thleng dawn a. Tennis inelna hi Clay Court-ah neih a nih hmel bawk si a, Spain in Gold Medal an beisei sang hle tura ngaih a ni.
Alcaraz hian naupang te a nih laiin French Open final-ah Nadal chetla chu hmuhnawm ti takin a en tawh a, a champion chakna ber pawh Rollan Garros hi a ni zui ta bawk. A champion chakna berah a champion ta a, lawm vangin a mittui a luang lo thei lo a ni.