French Open Semi-final-ah Djokovic leh Alcaraz

French Open 2023 hmawrbawk a hnai a, zirtawp zan khian mipa semi-final khelh a ni dawn. Thawhleh zana quarter-final hmuhnawm takah Novak Djokovic chuan dinhmun derthawnga a din hnuin Karen Khachanov a paltlang a, semi-final a lut. Thawhleh zana quarter-final hnuhnung zawkah World No. 1 Carlos Alcaraz chuan Stefano Tistsipas a sawp a, semi-final a lut ve bawk. Semi-final-ah player ngaihven hlawh pahnih Novak Djokovic leh Alcaraz te an inhmachhawn dawn a, anni inkhel tur hi final aia ngaihven hlawh ni hial tura rin a ni.
Grand Slam-ah vawi 22 champion tawh a, mipa lamah Grand Slam-a champion tam ber nih tuma hma lam pan mek Novak Djokovic chuan thawhleh zan khan Karen Khachanov a hmachhawn a, vawi riat a lo hneh tawh Russian lakah fiahna hautak a paltlang. Serb hian set hnih a hloh zawn hman thelh a, harsa taka set hnihna a lak hnuin set hnih dang chu harsatna lian tawk lovin a la zui ta thung.
Karen Khachanov lakah Djokiv hian bul a tan tha lo viau a, set khatnaah a serve a hum zawh loh vangin game li bak a la thei lova, set hloh hmasa zawkah a tang. Set khatna a hloh hnuin set hnihnaah an inhnehtawk zui leh viau a, game an inlak chhawk zak zak hnuin tie-break khelh a ngai. Tie-break-ah Djokovic a chungnung ta viau thung a, point sarih hmu zawnin set hnihna a la.
Harsa taka set a lak hnuin set thumnaah Djokovic a chungnung ta viau thung a, set thumnaah game hnih chiah hlohin set a la. Set hnih a lak zawn hnuin set linaah bul a tan tha leh viau a, awlsam taka chak thei tura ngaih a ni hman. Hmahruai zawk a nih laiin Serb hian a serve a hum zo lova, 4-4 a ni leh ta chiah. Beiseina sang tak nen Khachanov in lan zui mah se point hmu miah lovin a serve a hloh zui leh a, a beiseina a chuai zui leh nghal. Break a neih hnuin Djokovic-a’n awlsam takin a game a la zui leh a, tichuan 4-6 7-6 (7-0) 6-2 6-4 a hnehna changin semi-final a lut zui ta a ni.
Thawhleh zana quarter-final hnuhnung zawkah World No. 1 Carlos Alcaraz chu player langsar zinga mi Stefano Tsitsipas lakah mit la leh chelh rual lohin a inlan a, set hloh lova hnehna changin semi-final a inhlangkai.
Alacaraz hian vawi li a hneh zawn tawh Tsitsipas hi a ngam hle a, boruak sang tak hnuaiah chiai hauh lova inlan in, a khingpui hi kawng hrang hrangah a awpbet tluan zak. Alcaraz hian game hnih chauh hlohin set khatna a la a, set hnihnaa awlsam zawkin set a la zui leh. Set thumnaah Greek tlangval Tsitsipas-a’n a la hneh ngai miah loh Alcaraz hneh ve mial beiseina nung neiin, huaisen takin inlan mah se a ding khawng tluan zo lova, tie-break-ah chak lo zawk a ni leh. Hmuhnawm taka inlan Alcaraz hian 5th seed Tsitsipas lakah 6-2 6-1 7-6 (7-5) a hnehna changin semi-final a lut ta a ni.
Alcaraz vs Djokovic
French Open 2023 khelh meka khel tha ber leh tho thang tha bera ngaih chu World No. 1 Carlos Alcaraz hi a ni a. Quarter-final a pal tlang thlengin tha chungchuang takin a inlan a, Court chhunga a chezia reng reng hi champion zia dik tak a ni. Player hrang hrangte khelh dan enin Alcaraz hi champion phu ber a tih ngam a, champion tura rinkai ber pawh a ni chiang bal bawk. Kum 20 mi Alcaraz hian player thiam chungchuang, thiam famkim ber ang hiala ngaih leh pa paukhauh zet mai Djokovic a hmachhawn dawn a ni a, Djokovic a hmachhawn tur hi atan pawh fiahna hautak ber a ni ngei ang. Player dang angin Djokovic hi che hleithei lova siamin a sawp leh dawn nge, Djokovic hian player dangte a lo hmachhawn tawh thin angin a thlau dai leh zawk dawn tih hi Tennis ngainatute hriat chak, an ngaihven rawn a ni.
French Open-ah vawi hnih lo champion tawh, Grand Slam-ah vawi 23 champion tuma hma lam pan mek Djokovic pawh inelna kal mekah a khel tha chho viau a, quarter-final-ah set a hloh kha French Open 2023-ah set a hloh hmasak ber a ni. French Open-ah hian ‘Clay Court lalpa’ an tih hial Rafael Nadal a ngam lo deuh thin a. He hmuna a ngam loh ber Nadal a awm loh vangin atan champion awlsam sawt tura ngaih a ni. Rawlthar tha za, thiamna ril tak nei a, thahrui nei tha bawk si Alcaraz a paltlang a nih chuan atan champion a awl leh zual tura ngaih a ni.
Alcaraz leh Djokovic te hi Madrid Open 2022 semi-final-ah an lo inhmachhawn tawh a, inkhel hmuhnawm takah Alcaraz hian hnehna a changin final a lut. Hemi tum hian Nadal pawh a hneh nghe nghe a, a che ropui hle. Thawhleh zan dar 6:15-ah an inhmachhawn tur hi an intum vawi hnihna tur a ni a. Inkhel hmuhnawm, inkhel class sang a ni ngei dawn. A chak zawk zawk pawh awlsam takin an chak theih a rinawm loh.