French Open women’s final: Andreeva vs Chwalinska

Zanin French Open women’s singles final zet chu vantlang rin loh takin Russian tleirawl Mirra Andreeva leh qualifier Maja Chwalinska-te’n an khel dawn a, thil ni thei loa ngaih zawng zawng kalpel tawh an nih avang hian tu zawk nge chak dawn tih pawh rin thiam ngaihna a awm tawh lo e!
Roland Garros-a a tawp khar tur pahnihte semi-final match Ningania kan thlirliam tak ang khan kum 19 mi Andreeva chuan 6-1 6-3-in Ukrainian Marta Kostyuk a hneh a; an behchhan ram ve ve politik thila inmil loh vanga indo mek an nih avangin he last four match hi a boruak a sang viau reng a ni.
Semi-final lehlamah Chwalinska chuan Russian Diana Shnaider laka 7‑6(4) 6‑4 hnehna sualchhuakin, final-a Russian ve ve intum tur a dangchat a; professional era-ah qualifier ni chunga Grand Slam final lut thei pahnihna a ni.
Zanin final match-ah tu ve ve pawh hi chak se khawvelin Grand Slam champion thar a neih belh dawn a ni.
Kumin hian Roland Garros-ah top player rualkhat – defending champion Coco Gauff, he hmuna vawi li champion tawh Iga Swiatek leh world number one ni lai mek Aryna Sabalenka tihte an tlawm duai duai avangin finalist thar hlak pahnih an rawn chhuak ta nawlh a ni.
Roland Garros women’s champion tur chu zanin hian Court Philippe Chatrier-ah ngei chinfel a ni dawn a, tu zawkin nge Suzanne Lenglen Cup hawn dawn kan thlir ang.
Kum 2023 US Open title latu Gauff hnu lama tleirawl ni chunga Grand Slam title la leh thei hmasaber dinhmuna ding mek Andreeva chuan, “Tournament liana champion thei dinhmunah ka ding tih emaw Grand Slam final hial ka thleng ang tih emaw hi ka la ngaihtuah ngai lo.
“Engkim hi mumang ang ruai a ni ber. Player dangte’n engtin nge an ngaih ang tih hre lo mah ila heti ang hmuna final luh hi ka number one goal a ni,” a ti.
2021 US Open title latu Emma Raducanu hnu lama professional era china qualifier ni chunga Grand Slam final lut leh thei awmchhun Chwalinska pawhin Shnaider hmachhawn kha rilru leh taksa lama chona tling ve ve a nih thu sawi chungin a hnehna sualchhuah avanga a hlim em em thu a sawi.
Polish professional tennis player Chwalińska hi kum 24 mi niin, a career-a ranking a tawn san ber chu kumin May ni 4-a world No. 113 a han hawlh kha a ni a; a doubles ranking neih san berah nikum June thlatir khan No. 91 a thleng bawk.
Major tournament-a a thlensan ber chu tuntuma qualifier nni chunga 2026 French Open final a lut hi a ni.
Sara Errani leh Andrea Vavassori tangdun chuan French Open mixed doubles title an kawl lai an humhim fel tawh a ni.