French police ten kum 37 hnuah Jim Morrison thlan a\anga a lem an rukbo an hmuchhuak

French police ten kum 37 hnuah Jim Morrison thlan atanga a lem an rukbo an hmuchhuak
The Doors frontman thin, Jim Morrison thlana a hmel lem, lunga Croatian artist Mladen Mikulin ker an dah chu kum 37 vel zet a bo hnuah French police ten an hmuchhuak leh ta.
Jim Morrison lem hi Paris-a Pere Lachaise Cemetery a Jim Morrison thlanah a thih champha vawi 10-na pualin July ni 3, 1981 khan an dah a, mahse, kum sarih hnu, May 1988 khan an ru bo ta daih a ni.
He thil thleng hi a hunlaiin an chhuizui viau nain an hmuchhuak ta lawk lo va, Paris police te chuan case dang an chhuinaah kum 37 hnuah an hmuchhuak leh ta nawlh mai a ni. Mahse, police te chuan kum 37 chhung khan khawiah nge a lo awm tih erawh an la puang lo a, Morrison-a thlanah an dah let leh dawn em tih pawh an la puang lo.
Morrison hi Los Angeles rock band The Doors frontman niin, 60s kha an lar vanglai a ni a, kum li chhungin album pali an tlangzarh a, an self-titled album 1967-a an tlangzarh chu Billboard 200 chart-ah No.1 kaiin, he album-a hla ‘Light My Fire’ chu Billboard Hot 100 (singles) chart-ah No.1 a kai nghe nghe. An album zawng zawng hi chart top 10 a kai thei vek a, 1968-a an album ‘Waiting for the Sun’ pawh chart No.1 kaiin, he album-a an hla ‘Hello, I Love You’ chu Hot 100 No.1 a kai thei bawk.
Morrison hi Paris-ah July ni 3, 1971 khan kum 27 mi chauh niin a thi a, Paris-a Pere Lachaise Cemetery-ah phum niin, a thlan hi musician boral tawhte thlan zinga tlawhtu ngah ber pawl a ni.