FSL-in pawikhawihnaa inhnamhnawih kutzia 9000+ nei tawh

Forensic Science Laboratory Mizoram chuan pawikhawihnaa inhnamhnawih, an kutzia an laksak mi 9000 chuang a dah tha tawh.
Kum 5 kalta chhunga FSL hnathawh chhinchhiahnaa a lan danin, pawikhawihna a thlenin forensic science lam thiamte chetchhuahna a tam tial tial a, kum 2022 chho atang phei chuan kum khat chhungin case sang chuangah hnu chhuinaah an inrawlh tawh. Heng atangte leh hmun dang atanga pawikhawihnaa inhnamhnawih nia ngaih theihte kutzia (fingerprint), an data base-a an dahthat hi 9046 a ni tawh.
Directorate of Forensic Science Laboratory (FSL) dinhmun thlirin Zirtawpni khan Home minister K Sapdanga hoa thutkhawm a ni a. Home minister chuan FSL chu mipui leh ram inngahna, thubuai tam tak chinfelna hmun leh tunlai pawikhawihna chi hrang hrang chhuichhuah kawnga innghahna bul a ni tih a sawi a. Mizoram FSL pawh hmanraw tha zawk nena thuamthat a pawimawh tih a sawi a ni.
FSL hian Mizoram district hrang hranga police officer-te tan training a buatsaih thin a, hnu chhui kawnga an thawhthat avangin kum 2023 khan sawrkar laipui National Crime Records Bureau-a Central Fingerprint Bureau atangin ‘Best Case Award in Smart Use of Fingerprint Science in Investigation’ chawimawina an dawng a ni.
Mizoram FSL-ah hian DNA Division siam niin, India rama civil & criminal case DNA profiling ti thei laboratory 17-na a ni a. Modernisation of Forensic Capabilitites kaltlangin mobile forensic vehicle 10 lei chu endik vek an ni tawh. Mizoram FSL thumchakna atan kumin April 3 khan National Forensic Sciences University Gandhinagar nen thawh dunna thuthlung (MoU) an ziak a ni.