Fur a intan hma mai thei

Kuminah fur a intan hma mai thei a, a lo intan hma a nih pawhin thil mak leh thil thleng ngai lo a ni hran lo ang. Lo khukpui hluai tur chi pawh a nih hmel loh a, fimkhur erawh a tha ang.
India ramah June hi fur intan huna ngaih a ni a, June atanga September thleng hian fur lai (monsoon period) tih a ni. Mahse hei hi hun bi tuk thil a ni lo a, June hmain a intan thei, September-ah a reh hman thei.
Khawchin zirna leh chhinchhiahna hmunpui IMD (India Meteorological Department) chuan hmarchhak state hrang hrang leh Kerala velah fur a intan hma dawn a, May ni 26-ah a intan dawn tih an sawi.
Ruah a hnai em tih hi IMD hian an zir reng a, hmarchhaka ruah sur leh sur loh chungchang hi Bay of Bengal chunga boruak chet vel dan leh ruah a sur danah te a innghat. India rama fur hi Arabian Sea leh Bay of Bengal chung vela boruak chet vel dan, chhum awm dan, ruah a sur dan atangtein an thlir thin a, chutiang an thlir chuan IMD chuan fur hi a intan hma dawn tih an sawi a ni.
Tun hnaiah ruah a sur tluang a, State Meteorological Centre chhinchhiah dan chuan May ni 22 atang khan ni 26 thlengin ruah hi ni tin a la sur. Tam tlawrh tlawrha sur buan buan reng chu a ni lo a, tlem azawng a sur ni te pawh a awm. Fur a intan ta tihna pawh a ni thei.
Tunlai hi cyclone tleh hun a ni a, India ramah cyclone tleh hun hi March-June (pre-monsoon) leh October-November (post-monsoon) titein an then. June-ah fur a intan tih a nih laiin cyclone tleh hun chhinchhiahna lamah chuan June chu fur thlen hma (pre-monsoon) lama dah a ni thung a, fur intan hun hi a inthlak thei tihna a ni. Vanneihthlak takin kuminah IMD lam atangin cyclone tleh tur thu hrilh lawkna a la awm lo.