Fur ruah hmasa hân rih dawn, June 11 atangin tha tharin

India-a ruah sur chu chawlhkar khat vel a awl leh rih dawn a, June 11 vel atangin thapuiin a lo thawk thar leh dawn niin khawchin zirtuten an sawi.
Kum tin furpui lo thleng thin hi kuminah hian a intan hma a, kum 16 chhunga a intan hma ber kum niin weather bureau hotu lian pahnihin Thawhtanni khan sawi.
Furpui hi Indian economy $ tluklehdingawn maktaduai 4,000 chuang innghahna pawimawh tak a ni a. Lo leh thlain tui a mamawh bakah tuikhuah leh tui lak zawng zawng 70% dawn hi fur laia ruah sura innghat a ni.
India-a lo zawng zawng zinga a zahve vel zet chuan tuikawng an nei lo va, kum tina furpui an tin, June-September thla chhunga ruah sur hi an thlai chawm nan an ring tawp a ni.
Kumina fur intan meka ruah sur hmasa hi a awl leh rih deuh dawn niin India Meteorological Department (IMD) Pune office-a scientist SD Sanap-a chuan a sawi a. June 11-12 atang hian thapuia thawk thar leh tura beisei niin tuna a la tuam loh hmun dang pawh tuam chhuak tawh tura an ngaih thu a sawi.
Kumina fur ruahtui tla hmasa ber hi Kerala-ah May 24-ah thlengin reilo te chhungin chhim lam a tuam chhuak a, hmarchhak tuam lehin khawthlang lam hmun thenkhatah a sur hman bawk a. Heng zawng zawng hi a lo thlen thin pangngai aia hma hret vek a ni.
Ruah sur hmasa hi ni rei vak lo chhung chu a hân deuh rih dawn niin mi thiamte chuan an sawi a, fur thleng mek vilnaah pawh IMD chart-ah tar lan a ni.
Ruah lo haw leh tur hi Bay of Bengal atangin June 11 velah a intan leh dawn a, hetah hi chuan furpui tak tak ni tawh tura ngaih a ni a, India hmar lam pawh a tuam vek tawh dawn niin weather department hotu sangten an sawi a ni.
Kum dangah chuan fur ruahtui hi a dawng hmasa ber, Kerala-in June 1 atangin an dawng tan tlangpui thin a, July thla laihawl velah ram pum tuam chhungin lo neituten buh, vaimim, la, soybean leh fu chinna hun atan an hmang thin.
Kumina beisei aia hmaa ruah a sur hi lo neitute an lawm hle a, tam tak a sur bawk avangin a barakhaih hle zawk niin mi thiamte chuan an sawi.
Kumina fur ruah tla hma hi a tam tham hle a, India chhim lam leh hmarchhak hmun hrang hrangah chhiatna pawh a thlen nual hman a ni.