Fur ruah vangin Himachal-ah mi 75 thi tawh

Fur ruah vangin Himachal-ah mi 75 thi tawh
Himachal Pradesh-a tui hnaia fur ruahtui tla nasa avanga chhiatna hrang hrang thlenga thi chu mi 75 an tling tawh a. A tuar na ber, Mandi district-ah chuan chin hriat loh tam tak la awmin zawn leh chhanchhuah hna thawh mek zel a la ni.
Tlangram state-ah hian ruah sur nasa, tui lian, lei min, sabereka khuangkai leh ruah bawhawk sur an tawng nasa hle.
Deputy Commissioner Apoorv Devgan chuan tui lian tuarte chhawmdawl hna thawh pawh ‘ram thleng rem lo lutuk’ avanga a harsat thu a sawi.
ANI hnenah Devgan chuan Inrinni khan, “Vawiinah Thunag chu motor-a thlen theih a ni dawn a, mamawh phur tlem an awm sa a. A tul ang zelin pek an ni dawn a, chin hriat loh mi 31 an la awm mek bawk a. State Disaster Relief Force-NDRF mi 250 vel dah an ni a, chhun zan zawmin hna thawh a ni,” a ti.
Devgan-a hian fur lai a nih avangin ruah a la sur chhunzawm reng dawn a, hei vang hian mamawh chhek leh inpek kangah tan lak a ngai tih a sawi bawk.
“Chhawmdawlna inpek hi a hautak hle a. Mi awmna thlen tumin kan bei a, fur a intan chauh va, thla thum vel ruah a la sur dawn a. Kan tan chuan chhawmdawlna, puihna leh thil chhia siam that leh a hautak dawn hle a. Sorkar erawh chuan a tih theih ang zawng zawng a ti zel a ni,” a ti.
Inrinni khan SDRF team chuan Panchayat Jarode-a khua tlawhin mi chengte puihna thil an hlan a, heng lai vela ruah a sura hmun hlauhawm ni mai theite pawh fangin mi chengte pawh hmun him sanga insuan dan tur an ngaihtuahpui bawk.
An thlen theih chin zelah hian puihna thil dang bakah damdawi leh damdawia inenkawlna tur hmanraw mamawh zualpui an pe zel a ni.
Khaw kilkhawra awmte chu an dinhmun pawh damdawi thiamten endikin a tul ang zelin damdawi pawh an chawh bawk.
Hetih lai hian tun hnaia ruah bawhawk surin a nghawng nat tak, Mandi district-a Thunag chu Indo-Tibetan Border Police (ITBP) team-in an thleng a. Chhanchhuah leh chhawmdawl hna hmun hrang hrangah an thawk nghal.
ITBP team hi tual chhung thuneitu leh NDRF nen tanghovin hnawk an thian a, chin hriat lohte puiin in leh lo chânte an pui bawk.
Chief Minister Sukhvinder Singh Sukhu-a chuan Mandi district thuneitute chu chhawmdawl leh chhanchhuah hna chu chawl lova thawk tura tiin a mamawhtute mamawh thlensak zel tura tan la turin a ti.
Himachal Pradesh-ah hian fur ruahtui tla mekah chhiatna hrang hrangah mi 75 an thi tawh a, an zinga 45 hi ruah kaihhnawih niin 30 erawh chetsualna thleng, kawngpuia tlan lian, electric man leh gas puak vangte a ni tih State Emergency Operations Centre (SEOC) chuan a sawi.
SEOC-in a chhinchhiah dan chuan June 20 leh July 4, 2025 inkarah tlangram state-ah hian hmun tam takah chhiatna a thleng tih an tar lang.
Hliam tuar mi 288 awm tawhin sorkar leh mi mal thil chhia ringawt pawh Rs vaibelchhe 541.09 man hu a ni tawh.