David Zochhuanmawia
(Vida Hrahsel Saza)
-- Advertisement --
June 23, 2024 (Pathianni) zing dar 4:30 velah ka harh hlawl mai a, ruah a lo sûr nasain a then tan erawh tui taka muthilh siai siaina tûr khua a lo ni. Mahse, kan tân erawh inchunga tui tling thin chuan rilru mawlh hmasa berin ka inperh tho nawlh a, inchung tui paihna pipe pahnih chu ka han hip a, inchunga tui tling chu ka paih a.
Kan chhungkua hian ruahtui dahkhawl hlutzia hriain inchunga Âr In/Kudam kan sak chu Rângvàa khâwrin tuidawn mumal tak kan siam a, chu chu pipe-a la thlain inhnuai tanky-ah kan khawh luhtir a, ruah a sûr hnem poh leh tanky-a tui lut Pathian malsawmna kan dawng hnem ting a ni mai. Inchung zawla tui tling erawh a thianghlim tawk loh avangin a paihna tûr pipe hran siamin chumi hmang chuan keini in hlui tawh lam chu ‘Fûr’ lai hi chuan kan buaipui ve viau thin a ni.
Fûr lai hian kan tui tlan ber Tlawng tui a nut deuh thin avangin a thawktu lam ten harsatna neiin kan mamawh khawp tui an pump thei lova, fûr ruahtui tam lai ê ti lo chuan PHED tui erawh thla khat bâwr dawng lote kan ni fur lawi a. Tui dahkhawlna tha nei tûra kan infuih nasat thin tehlul nen sorkar hian Fûrpui ruah a lo thlen pawha harsatna tâwk lo tûra tui dahkhawlna tha zawk a siam belh a va pawimawh tak êm! Kum tin tui lian avanga kan harsatna hian min bêng harh tawh teh se!
Restricted Tender emaw, Departmental works lam sawi reng ai chuan kan ram hnuk tak tak lam hi ngaihtuah a pawimawh hmasa hle mai. Tui tel lovin mihring kan nung thei lova, Gas hnianghnar zawk leh kawngpui tha neih hi chu ram mipui hian kan phû ve a ni. Sorkar tha leh tha lo kan tehna tûr hi ‘Kalphung thar’ a nihna emaw, midang tih thin loh dana a tih duhna ringawtah kan teh tûr a ni lova, Party dang tih that loh aia thaa an tih leh tih loh ‘Dikna leh Rinawmna’ lamah kan teh zawk tûr a ni ang.
Kan hrawn mek sorkar a nih miau avangin kan sawi lo thei lova, a Party angin kan va dem êm êm hran lo e. Sorkarna lo siam hmasa tawhte pawhin hmâ an la nasa tawk lo pawh a ni ang. Mahse, ka ti lehpek thin ang. July 2, 2024 a Lungleia Cabinet Meeting neiha sorkar sum tam tak luâng ral tur han thlirte hian rilru a ti nâ a, hê’ng sum luangral tûr ai hian PHED tui dawng mumal lo hnenah tui thianghlim tha ngaihtuah sak zawk se tih hi beisei ngam chi ni si lo, mâwlmang taka ngaihtuahna vâk vel mai mai a ni.
A tâwp berah chuan ‘ram tha’ kan nei a, a chhunga chêngte lahin thu kan awih a, sorkarin ti tûra min tihah a thu kan zawm lo ngai lova, ‘mipui tha’ kan nei bawk a ni. Ram tha leh mipui tha hmanga hnathawk tûra mawhphurhna min pek zâwm zelin sorkar chak tha a awm theih nan theihtawp chhuah tlâng ila. Ruahsur zawha fiah tak maia thingkung leh boruak mawi taka a thiâng kuar ang hian ‘Fur Khawthiang’ hian kan nunah takna leh dikna entir se, lang lo tûra thuhrûk awm ve lo tûra chianga lang fiah reng tûrin inbuatsaih thar sauh sauh zel ang u.