Furpuiin India tuamchhuak
India chuan June thla khan ruahtui a dawn tura beisei aia tlem below-normal rainfall a dawng a, a deficit chu 11% lai niin kum nga chhunga a san ber a ni tiin India Meteorological Department chuan a tarlang.
IMD te chuan India chuan June thla khan normal 165.3mm dawn tura hisapah 147.2 mm chauh a dawng a, kum 2001 hnua a dawn tlem ber tum a ni bawk a ni.
May 30 atangin Kerala leh northeast region ah furpui a intan hnuah Maharashtra a thlen hnuah monsoon chu tlahniam deuh thutin West Bengal, Odisha, Jharkhand, Bihar, Chhattisgarh, Madhya Pradesh leh Uttar Pradesh te thleng mai lovin hei vang hian khawlum turu tak an tawrhphah bawk a ni.
“India-in below-normal rainfall activity ni 16 zet June 11 atanga June 27 thleng khan a hmu a, chuvang chuan below-normal precipitation a awm phah a ni” tiin IMD chief Mrutyunjay Mohapatra chuan a sawi.
IMD te chuan northwest India in 33% rainfall deficit, central India in 14% deifict, east leh northeast India in 13% deficit an hmu a, South India chuan June thla khan 14% surplus a hmu thung a ti bawk a.
Tihian Southwest monsoon chuan beisei aia hma ni ruk laiah India ram pum a tuamchuak tawh thung tiin IMD te chuan an sawi bawk a.
“Southwest monsoon chuan Rajasthan, Punjab leh Haryana te pawh tuam bawkin tihian 2nd July 2024 ah ram pum a tuam ta a ni” tiin IMD te chuan thuchhuah an siamah an sawi a ni.
July thlaah erawh IMD te chuan ruahtui tla tam above-normal rainfall an beisei thu an sawi thung a. June thlaa ruahtui tla tlem chu July thlaa ruahtui tla tamin chhanin agriculture lamah nasa takin a pui dawn tiin an sawi bawk.
July thlaah India eastern, northeastern leh northwestern ah te ruahtui a tla tam dawn a ni, tiin IMD Director General M Mohapatra chuan a sawi a.
“Above-normal rainfall hian nasa takin agriculture leh water resources lamah hlawkna a thlen dawn a, chutihrual chuan tuilian, leimin leh transport lama harsatna te, hriselna lama harsatnate leh ecosystem te a tichhe thei thung. Chuvangin, infrastructure thawmthat te, IMD early warning system ngaih pawimawh te, surveillance leh conservation lam tihchak te a pawimawh ang” tiin India Meteorological Department te chuan thuchhuah an siamah an tarlang bawk.