Future leh Metro Boomin te album intawm ‘We Don’t Trust You’ a hla panga chu Billboard Hot 100 chart top 10-ah a debut a, chung zingah chuan Kendrick Lamar te nena an thawhhona ‘Like That’ chu No.1 a ni. Hetihrual hian Hozier hla thar ‘Too Sweet’ pawh top 5-ah a debut.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Future, Metro Boomin & Kendrick Lamar ‘Like That’ hian kar khat chhungin US-ah stream maktaduai 59.6 leh sales 9,000 neiin, radio airplay-ah pawh ngaithlatu maktaduai 5.6 a nei pha a, hei hi chart-ah a No.1 pui ta a, Future tan he chart-a No.1 kai thei la pathum a neihna niin, Kendrick Lamar tan a pathumna tho a ni a, Metro Boomin tan eraw a vawi khatna a ni ve thung.
Chart top 10-ah Future leh Metro Boomin album ‘We Don’t Trust You’ atangin hla panga langin, Travis Scott leh Playboi Carti an thawhpuina ‘Type Shit’-in stream maktaduai 34.9 neiin, No.2 a ni a, Travis Scott an thawhpuina ‘Condrella’-in stream maktaduai 25.9 neiin, No.6 a ni a, an album title track ‘We Don’t Trust You’-in stream maktaduai 24.7 neiin No.8 a ni a, The Weeknd an thawhpuina ‘Young Metro’-in stream maktaduai 24 neiin, No.9 a ni bawk.
Future hian Hot 100 chart top 10-a lang thei hla 15 a nei tling ta a, Metro Boomin tan 10-na a ni a, The Weeknd tan 18, Travis Scott tan 17, Kendrick Lamar tan 13 leh Playboi Carti tan palina a ni ta bawk.
Benson Boone ‘Beautiful Things’ chu No.2 atangin No.3-ah a tawlh a, chart No.1 hlui Teddy Swims ‘Lose Control’ chu No.1 atangin No.4-ah a tawlh ta bawk.
Hozier hla thar ‘Too Sweet’-in stream maktaduai 28.8, sakes 4000 leh radio airplay 2,68,000 neiin No.5-ah a debut. He hla hi a album thar ‘Unheard’ atanga a single a ni. Hozier hian kum 10 dawn hnuah chart top 10 kai thei hla a nei ve leh chiah a, he chart top 10-a a lanna hmasa ber leh a lar chhuahna ‘Take Me To Church’ kha December 2014-ah chart No.2 a kai, kha hla hnua he chart top 10-a a lang leh thei hla a nei ve leh ta chiah a ni.
Chart No.1 hlui Jack Harlow ‘Lovin on Me’ chu No.4 atangin No.7-ah a tawlh a, chart No.1 hlui bawk Ariana Grande ‘We Can’t Be Friends (Wait for Your Love)’ chu No.3 atangin No.10-ah a tawlh ve ta bawk.
Future, Metro Boomin & Kendrick Lamar ‘Like That’ a Hot ber
Get real time updates directly on you device, subscribe now.
Prev Post