G20 intawhkhawm denchhenin Aizawla hrui zam hnawk senghawi

Kumin March 2-a Aizawl-in G20 intawhkhawm a thlen tur inbuatsaihna atan Aizawl khawpuia hrui inzam hnawk senghawi hna thawh mek a ni.
Aizawla G20 intawhkhawmna hnuaia intawhkhawmna dang chi khat – B20 intawhkhawm atana inpuahchahna leh inbuatsaihna hrang hrangte thlirin Zirtawpni khan G20 Core Committee chairman, Home commissioner H. Lalengmawia kaihhruaiin neih a ni a. chairman chuan intawhkhawmna atana inbuatsaihna leh inpuahchahna kalpui mekte a tha thawhkhat nia a hriat thu sawiin, Sub Committee hrang hrangten an hmalakna reng reng Mizoram hmel lanna bakah India ram hmel lanna a ni tel tih hrereng turin a chah.
Thutkhawmah hian Sub Committee 9 te hma lakna leh ruahmanna theuh, an hmachhawp leh hmabak bakah harsatna an la neih te sawi ho a ni a. Sub Committee te chu an huangchhunga hmalaknate a felfai zawkna’n ‘check list’ siam vek nise tia thurawn pek a ni.
Aizawl khawpuia hrui inzam hnawkte senghawi leh tawnfel hna hi Power & Electricity department ruahmanna hnuaia kalpui mek niin, February 24 aia tlai loa a tlangpui zawhfel beisei a ni a. Sub-Committee on Beautification, Cleanliness and Hoarding/Banner chuan Lengpui atanga Aizawl kawngdung tifaiin bawlhhlawh leh hnawmhnawk senghawi dan an ruahman mek.
Hei bakah hian khawpui hmun hrang hrang a theih ang anga tihfai leh tihhnum dan an ruahman mek bawk. Hemi atan hian local council-te thawhpuia sawmin, February 18 & 28 ah hnatlangpui an ko a ni.
Core Committee chuan Lengpui leh Aizawl kawng dunga chengte bakah Aizawl veng hrang hranga chengte chu faina leh thianghlimna kawnga hma lakpuia sawmin, G20 intawhkhawmnaa lokal tur ramdang palaiten Mizoram chu state fai leh thianghlim taka an hmuh theih nan anmahni zawnah theuh faina leh thianghlimna kawngah theihtawp chhuahpui turin a ngen tih an sawi.