Lawyer Umesh Pal a tualthih atanga ni 50 ral velah gangster nia politician-a inlet zui Atiq Ahmed chu Prayagraj khawpuia Calvin Hospital-a medical check-up nei tura an hruai chu kahhlum a ni.
A hmalawkin kum 62-a upa Ahmed, Umesh Pal murder case leh case dang 100 vela puha awm mek chuan ngenna siam in, “Vaivut tluk lek ka ni ta a, mahse, khawngaihin chhungkuaa hmeichhia leh naupangte chu khawih ve suh u,” tiin police van chhung atangin a sawi.
Bahujan Samaj Party MLA Raju Pal thahnaa key witness Umesh Pal tualthahnaa Opposition tena nasa taka sawiselna an kalpui hnuah Uttar Pradesh Chief Minister Yogi Adityanath chuan February 25 khan Asssembly-ah a sorkar chuan mafia te chu a tukzal tur thu a sawi a.
April 13 khan Ahmed fapa kum 19-a upa Asad leh a thian Ghulam te an pahniha tualthah thubuai nei leh Rs 5 lakh luman nei te chu Uttar Pradesh Police Special Task Force te nena Jhansi bula inkahna an neihah kahhlumin an awm bawk a.
Ahmed hian criminal case a neih hmasak ber chu kum 44 kalta daih tawh khan niin mahse February 24 a Umesh Pal thah a nih hnuah State sorkar chuan criminal netwrok te tukzal tura hmalakna nasa zawkin a kalpui ta chauh a ni.
-- Advertisement --
Crime leh politics
Kum 1990 leh 2000 chhova State politics buai niai nuai chu remchangah hmangin khatihlai khan Uttar Pradesh-ah Chief Minister term hmang zo an awm ngai lo va, President’s rule tum thum lai puanin a awm mek a, chumi remchang chu chuhin Ahmed chuan extortion leh land grabbing nasa takin a kalpui a ni.
Kum 1989-ah politics luhchilhin Allahabad constituency-ah Independent-in a ding a, a tling zui. A tling mai a ni lo, kum 1991 leh 1993 inthlanah thlan tlin zui a ni leh a. A hnu kum thum a veiah Samajwadi Party (SP) ticket-a ding lehin a chak zui leh a. A hnuah Apdal Dal zawmin State president a ni zui a, kum 2022 khan a seat a hloh chauh a ni.
Kum 2004 Lok Sabha election ah khan SP te chuan Phulpur a ding turin Ahmed hi an thlem a, ding zuiin 50,000 vote chuangin a chak zui a. He mi kum vek hian a unaupa Khaliz Azim chu Allahabad West bypoll ah dingin mahse BSP candidate Raju Pal chu 5,000 vote in a hneh lo thung.
January 2005 khan Raju Pal chu thahin a awm a, Ahmed, Ashraf leh midang pasarih te chu FIR-ah tualthattua puh an ni a. Bypoll neihah Ashraf chuan Raju Pal nupui Puja chu 11,000 vote in a hneh zui bawk.
A kum lehah Umesh Pal chuan Ahmed leh a thuihruaite chuan ru boin tihluihnain court-ah Raju Pal murder case-ah an dinhmun a that theih nana thu sawi tura an tih luih thu a sawi a. Politics thila buainain zui nghalin Ahmed pawh inhnukdawkin kum 2008 khan SP atangin hnawhchhuah a ni zui a ni.
Kum 2014 Lok Sabha inthlanah khan Shravasti constituency atangin SP candidate niin mahse vote nuai khat dawnin a chak lo a. February 2017 khan Ahmed chu assault case ah man a ni a, Uttar Pradesh-a lung in tang chunga sumdawng Mohit Jaiswal rukbo dan tur ruahmanah puhin Supreme Court thupek angin June 2019 khan Gujarat a Sabarmati Central Jail ah dah luh nia sawn a ni.
Kum 2019 Lok Sabha inthlanah khan Independent-in Prime Minister Narendra Modi chu Varanasi-ah a khing a, mahse, vote 855 chauh a hmu thung.
Chhui zui a ni
State sorkar chuan Ahmed court case te chu Umesh Pal nupui Jaya-in amah mai bakah a nupui Shaista Parveen, a fapa te leh a unaua Ashraf te leh a thuihhruai hrang hrangte laka thubuai a siamsak chu chak zawka kalpui a ni a.
Hun rei lo te hnuah tualthahnaa inhnamhnawih pahnih a thuihruai Arbaaz leh Usman te chu police te nena inkahnaah kahhlum an ni a. March 27 khan Ahmed chu Prayagraj a Nanini Central Jail ah khung a ni a. A tukah MP/MLA court chuan kum 2006-a Umesh Pal rukbo case-ah damchhung lung in tang turin a ti ta a ni.
April 12 khan Enforcement Directorate te chuan Ahmed thuihhruai te hmun hrang hrang 15 chu an dap thut bawk a, benami property Rs 100 crore vel mansak an ni bawk.
A tukah Prayagraj court chuan Ahmed leh Ashraf te chu Umesh Pal murder case-ah tho ni 14 kawla thu zawhfiah turin police-te kutah an pe a. Kar kalta Inrinni zan khan Ahmed leh Ashraf-te chu medical check-up pangngai nei tura an kalpui chu mi pathumin hnai takah an kah rawn ta a, hei hi TV Live laia thleng a ni a, inkaphlum lai hi chiang takin TV-ah a lang a ni.