Myanmar leh Sri Lanka-ah China inbun

Myanmar Coco Islands-a military facility bun tur leh Sri Lanka a satellite receiving ground system China puihnaa bun tur chuan India enthlakna remchang siam tumna tia ngaihna leh hlauhna a siam.
Tun hnaia satellite thlalak pholanah Coco Island-ah military facility bun mek niin hei hi India rama Andaman and Nicobar island chain bul hnai lawk a ni a. Hei mai bakah hian China chuan Chinese Academy of Sciences leh University of Ruhuna, Southern Sri Lanka te tangkawp chuan Aerospace Information Research Institute din an tum bawk a, hengte hi Indian assets te spy nan leh information pawimawh hriat ruk theih nana hman a nih a hlauhawm hle tiin security establishment te chuan an sawi.
A bik takin Andaman and Nicobar island atanga 60km leka hla Myanmar rama Coco island-a military base din mek chu Chinese sum senga kalpui mek tia sawi a ni a. “Radome (radar laka him nan dome ang taka sak) pawh satellite thlalak atangin hmuh a ni,” tiin sawi a ni a. Coco island hi chhim lam ram nena thlunzawm nan lei 175m a sei dawh mek niin a zau lam pawh 8m a ni tih a ni bawk a. Heng facility te hi Chinese military tena mamawh huna an hman theih tura ruahman tia sawi a ni bawk.
Thla kalta khan London-based think tank Chatham House te chuan January 2023-a Maxar technology te satellite thlaka phochhuahna a nei a. “Hangar thar pahnih, causeway thar leh accomodation block ni awma langte chu hmuh theihin a awm a, hei bakah hian runway 2,300 metre vela thui leh radar station te a awm bawk,” tiin a tarlang.
Tun hma pawhin kum 990 chhovah khan China chuan Coco island-ah hian intelligence facility bunin a enkawl tawh tia lo sawi tawh thin a ni bawk a.
Satellite tracking facility te hi civilian leh sipai tena an hman tawn ve ve theih a ni a, a bik takin Chinese civil space programme te chu Chinese military te nena insi hnai taka thawkho reng tia hriat lar an ni bawk. China-in helai region-a nasa zawka hma a la hian Indian assets pawimawh leh information pawmawhte a hriatruk theih phah dawn nia ngaih a ni bawk a.
India-in Sriharikota a satellite launch facility a neih te, Odisha a integrated missile test range a neih te chu Coco Island atang hian chiang takin China chuan a spy thei reng dawn tia ngaih a ni a. China hian Asia mai ni lo South America lamah pawh network zau zawka siamin a inphan mek a, Antartica-ah pawh a inbun mek zel bawk.
Tun hnai lawkah pawh Chinese research and survey lawng chu Sri Lanka-a Hambantota-ah a chawl a, he enthlakna lawng lian pawimawh tak hmang hian helai region vela thil pawimawh tak tak te chu China chuan a lakhawm thei ngei tura ngaih a ni bawk.
August 2022 khan Chinese spy ship ‘Yuang Wang-5 chu Hambantota ah hian a lo chawl tawh bawk a, China leh Sri Lanka chu diplomatic lamah inbakkaihna a thlen phah tawh a. Khami kum vek November thla khan enthlakna lawng tho ‘Yuan Wang-6’ chuan Indian Ocean Region a lut bawk a, khatih lai kha India-in long-range missile enchhin a tum lai ni bawk mah se, a thulh zui a, a hnuah India-in missile enchhin hun a ruat lehah he lawng bawk hi Hambantota ah hian a chawl zui leh bawk.