Garage leh dan kenkawh chungchang….

Gauhati High Court thupek bawhzuiin Aizawl Traffic Police leh Transport Department tangkawp chuan tunhnai February ni 9 atang khan garage nei lo, kawngpui dunga lirthei dahte an endik a, dan bawhchhia LMV leh two wheeler thahnem tak an awm a. ‘Garage nei lo tan lirthei rigister theih a ni lo’ tih dan bawhchhiatna a nasa hle tihna a ni.
‘Aizawl Traffic Jam Free’ policy kan kalpuina pawh a rei ve leh ta viau mai. Kum 2010 atang khan Mizoram M/V Rules 1996 siam danglamin ‘lirthei register tur chuan a lirthei dahna tur garage a nei ngei ngei tur a ni’ tih a ni. October 2013 atangin he dan hi hman tan a ni a, mahse awmzia a nei tak tak lo. Dan (Rules) hian awmzia a nei lo tihna ni lovin, dan kenkawh that loh vang zawk niin a lang. Garage nei si lo lirthei register a tam dan atangin a lang reng mai.
Co-ordination Committee on Traffic Management chuan, lirthei nei si, garage nei lote chu, kum khat leh thla hnih chhungin garage an nei vek tur a ni, tiin hun thawl tak (1st October 2016 atanga 30th November 2017) a siamsak leh a. Hemi chungchangah hian Transport Department chuan thuchhuah a siam a: “Ram roreltute thupek zawmtu chu ram tana thawk tha an ni a, zawm lova dan bawhchhetu erawh ram hmelma an ni. A bawhchhetu chu hrem a ni dawn si a,” tiin.
Hei mai hi a ni lo a, Co-ordination Committee on Traffic Management chuan, hun tiam chhunga garage nei lote chu zing dar 7 atanga zan dar 7 thleng Bawngkawn-Kulikawn inkar tlan phal loh ni se, dan bawhchhia chu vawikhatnaah Rs 3,000 chawitir ni se, a vawihnihnaah Rs 5,000; chumi hnu pawha garage an la nei lo cheu a nih chuan registration/driving license tihtawp ni se, tiin a rel a. December ni 1, 2017 atangin Traffic, AMC, Transport leh Local Council ten an huam chhung kawngkama zanriak lirtheite hnuk sawn thin se, tih a ni bawk.
Dan hi chu kan nei tha khep khep thin khawp mai, mipui hrilh hriat pawh kan taima khawp mai; mahse, a kenkawh lam kan pachhe thung. Eng vanga dan bawhchhiate hi awm nghek nghuk thin nge kan tih chuan, taima taka dan siamtuten, taima takin dan an kengkawh zui lo a ni mai. Dan bawhchhetute hi an demawm a; a nihna tur anga dan kengkawh lote pawh an demawm. An demawm a ni satliah mai lova, hei pui, khawpui a chep phah vek a, mipuiin kan tuar mek chu a nih hi mawle!
‘Ram dangah chuan dan an zah’ kan ti thin a, a chhan chu dan kengkawhtuten dan an kengkawh taima em a, mipuiin dan an bawhchhe ngam lova, dan zahna a lo piang mai.
Aizawlah hian lirthei khalhtuten traffic rules an zawm tha a, a chhan chu, traffic duty-te hian traffic rules an kengkawh tha a, an hna an vil ngun vang a ni. Thildangah pawh hian, dan hi kengkawh tha ila chuan, ‘Mizoram mipui chuan dan an zah’ tiin kan thang mawi leh mai ang!