Indian billionaire Gautam Adani chu khawvel mihausa tawntaw zinga a hausakna tlahniam duai duai chak ber te zingah a tel a. Khawvela mihausa ber pathumna atangin ni hnih khat lekah a tla thla vawn vawn mai a ni.
-- Advertisement --
Gautam Adani chuan share sale neih an tum pawh thulh a nih thu puangin Adani Enterprise te chuan investor te hnena sale atanga an sum hmuh $2.5 billion pawh an pek let leh tur thu a puang zui a.
Heti tak maia Adani te thawklehkhata an tlakhniam duai duaina chhan chu US investment firm pakhatin Adani Group firm te chu inbumna kalpuia an puh vang a ni a. Adani te chuan an pha ve thung.
Ni rei lo te chhungin Adani Group hnuaia company te chuan an market value $ 108 billion lai an hloh hman a. Mimal tak pawhin Adani chuan a mimal sum leh hausakna $ 48 billion hloh der tawhin Forbes real-time billionaire list ah 16-naah a tla thla dawrh tawh bawk.
Eng tiangin nge?
Kar hnih pawh tling lovah khan Adani chu khawvela mihausa ber pathumna a ni.
Adani Enterprise share te, a flagship company ports atanga energy conglomerate thlengin 25 January ah hralh tum a ni a, India rama secondary share offering lian ber tura ngaih a ni bawk.
Mahse, share hralh hma ni chiahin US-based investment firm Hindenburg Research te chuan Adani group te chu kum sawm tam zak hauh lova stock manipulation leh accounting fraud kalpuiah an puh a.
Hindenburg te hi ‘short-selling’ specialist, company share price te a tlahniam thuai dawn tia beiseia thap thin te an ni.
Adani Group te chuan Hindenburg Research report hi ‘information dik lo leh behchhan nei lo’ tiin an sawi a, an chhang let chungin investor tena hlauhthawnna an neih chu an hmin zo chuang lo.
Adani group te hian publicly trade company pasarih lai neiin sector hrang hrang commodity trading, airports, utilities, poets leh renewable energy lam te a ni hlawm a. Indian banks leh state-owned insurance company te pawhin Adani group-ah hian investment lian tham tak taka tiin dollar billion tel Adani te hi an puktir bawk.
Chung zawng chu em ni?
Ni lo, market buai nuai zelah Adani Group te chuan Hindenburg Research te chhanletna phek 400 chuang laia chhah tichhuakin, chutah chuan Hindenburg report chu ‘thiam taka India beihna’ an ti zaih bawk a.
Adani Group te chuan local law leh regulatory te dan zam engkim an zawm vek an ti bawk a. Hindenburg report chu sawiselin ‘dik lo taka sum lama hlawkna nasa tak hmuh tumna’ an tih sak bawk.
Mahse, Hindenburg Report te chuan an thil sawiah an chian thu sawiin Adani group te chuan ‘zawhna 88 kan pekah 62 an chhang thei lo’ an ti mauh thung.
Market a nghawng dan?
25 January-a Adani Enterprise hralh a nih khan ngaihven a hlawh lo hle. A tukah pawh an share 3% chauh chu subscribed in a awm a, retail investor ten an tlansan tlat a ni.
Mahse, 30 January a nih meuh chuan institutional investor leh corporate funds te Adani group puih te chuan an thlawpna an tilang a. UAE royal family member te thlawp Abu Dhabi’s International Holding Company chuan $400 million share lei nan an theh chhuak a ni.
Hun tawp dawn ruaiah Indian tycoons Sajjan Jindal leh Sunil Mittal te pawhin Adani share te chu an ngamna tawkin an subscribe sak zui bawk.
Analyst Ambareesh Baliga chuan share sale hmangin Adani Group te chuan an shareholding tihlen an tum chu an thei ta lo a ni a ti a, Adani group company hrang hrang te share pawhin tlak hniam a pan zui ta zel bawk.
Hma lam hun?
Reserve Bank of India chuan Indian bank te Adani group te hnena sum puktirtute chu kovin a kimchangin an sum puktir dan te sawifiah turin a ti tawh a.
Adani chuan, “Kan balance sheet te a hrisel tawk a, sum lut a tam a, asset te a him a, kan leiba te rulhna kawngah sawiselbo kan ni,” tiin a sawi a.
Brokerage OANDA a analyst Edward Moya thung chuan share lakchhuah chum chum hi a ngaihthat thlakloh a, a chhan ber pawh shareholder ten company-ah rinna nghat se chuan an share an lachhuak lo tur a nia tiin a sawi.
American investment bank Citigroup’s wealth arm te chuan margin loan lakah Adani group te security chu collateral-ah an pawmsak duh lo zui nghal a, Credit Suisse pawhin Adani group te bond chu a pawmsak duh tawh lo zui bawk. Ratings agency Moody’s unit ICRA te chuan Adani Group stocks te chu uluk taka an thlithlai mek reng thu an sawi bawk.
Vinayak Chatterjee, founder and managing trustee of the Infravision Foundation chuan Adani Group te harsatna chu hun rei lo te thil mai tur niin a ngai thung a. “Kum tam tak chung infrastructure expert nihna angin Adani Group te hi ka thlithlai tawh a. Ports, airports, cements leh renewables lam thlengin an hmalaknate leh an sum lakluh hrisel thawkhat tak te ka hmu a ni. Stock market a thil inthlak danglam thut thut lakah hian an himin ka hria,” tiin a sawi thung.
Mahse, Hemindra Hazari, indepdendent research anlyst thung chuan “Market regulator SEBI emaw sorkar atanga engmah sawi kan la hre lo hi chu a mak a ni,” a ti ve thung a. “Investor te hlauhthawnna hnem tur pawhin sawi nei awm tak an ni,” a ti bawk.
He issue hian politics lamah pawh inbeihna a thlen nghal a. Adani hi Prime Minister Narendra Modi nena inhnimhnai tak niin opposition te chuan PM Modi nena an inhnimhnaih avangin hlawkna tam tak a tel an ti a, hei hi Adani chuan a hnawl ve thung.
Opposition party te chuan parliament-ah sawihona neih an ngiat a, chutih rual chuan Hindenburg Report a puhna te pawh chhui chian an phut bawk a. House pawh rorel hlei thei lovin an siam bawk.