Gaza-ah inkahhai a awm theih beiseina

Western leh West Asia ram te chuan US President Joe Biden-an Gaza-a inkahhai a awm theih nana ruahmanna a siam chu an thlawp tlang.
Washington chuan three-phase plan a siam chu UN Security Council resolution hmanga thlawpna a ngen tur thu sawiin Group of Seven ram te pawhin an thlawp thu an sawi.
Biden ruahmanna siamah Israel chuan chuan indona chu a tirah kar ruk chhung a chawlhsan tur a ni a, chutih chhung chuan Palestinian prisoners te nena mitang inthleng tawnna a thleng ang a, chutah Gaza dinthar leh tan a ni ang a ti.
Israeli Prime Minister Netanyahu thung chuan indona chu mitang chhuah tawn avangin khailak chauh turah a ngai a, Israel tum ber chu Hamas nuaichimih a ni tlat si a ni.
Mahse White House chuan Thawhtanni khan ruahmanna chu Israel siam a ni a, Washington draft a ni lo tia sawiin ‘Israel rawtna a ni’ tiin National Security Council thupuangtu John Kirby chuan a sawi a. “He thilah hian diplomacy turu tak kalpui a ni” tiin a sawi.
Hamas te pawhin Biden rawtna siam chu ‘positive’ tia sawiin mahse a bak sawi zui an la nei lo thung a. Hamas tena an duh ber chu permanent ceasefire leh Gaza atanga Israeli sipai te inhnuhdawhtir vek a ni.
Tunah erawh inkahhai a la awm loh avangin Israel sipaite chuan vansang atangin leh laipui hmangin Hamas te chu nasa takin a beizui mek reng a ni.
Washington chuan UN Security Council resolution chu Thawhtanni khan phochhuakin inremna awm theih nana rawtna thar chu tikhawtlai lova pawm turin Hamas-te chu a ngen bawk.
US Ambassador Linda Thomas-Greenfield chuan hruaitu tam tak leh sorkar tam takinin he ruahmanna hi an thlawp a ni tiin a sawi.