Indian PM Narendra Modi chuan Lok Sabha inthlan neih zawh takah a term thumna chelh thei turin dinhmun thaah a awm nachungin beisei an phak lo hle.
Bharatiya Janata Party (BJP) te chuan seat 543 awmna parliament-ah sorkar tura mamawh zat seat 272 pawh an la pha lo va. Mahse, a thawhpui party dang te nen chuan sorkar siam thei khawpin seat an la hnem thung.
Lok Sabha inthlan result chu Modi tan duhawmlo zet mai niin, Chief Minister of Gujarat a nih lai leh India prime minister a nihna angah pawh majority nei reng thin leh India ram politics hun rei tak thunun tawhtu a ni.
Kumin Lok Sabha inthlanah beisei aia sangin Congress party kaihhruai INDIA opposition alliance te chu an che tha a, exit poll leh pre-election survey te an dah nil hneh hle a ni.
India inthlanpui khan kar sarih awhin mi maktaduai 640 chuangin vote an thlak a, election thuneitute chuan ‘world record’ tia sawiin vote thlaktu zahve deuhthaw chu hmeichhia an ni.
Seat lak tam lamah chuan BJP te chu party lian ber la niin Modi-an sorkar a siam leh thei a nih chuan India prime minister hmasa ber Jawaharlal Nehru tlukpui chiahin term thum a sorkar dawn tihna a ni bawk.
Inthlan campaign a Modi auhla ber chu seat 400 lak tlin a ni a, mahse, an beisei angin thil a awm lo hle a, inthlan hmasak aiin seat 50 chuangin an la tlem zawk zui.
Congress camp lamah lawmna a awm laiin BJP quarter lamah beidawnna a thlen thung a. BJP te chu party lian ber ni mahse inthlan boruak turu tak leh beiseina sang tak an neih a hlawhtlinloh avangin party worker tam tak te chu an hnual hle a ni.
Modi thlawptute chuan term thumna chu an lak tur chiangsaah ngaiin a chhan an sawiah pawh sorkar ngelnghet welfare programme kalpui chhunzawm zel thei tur leh khawvel huapa India hmel titha zeltu an ti.
Hindu nationalist chu behchhan bera hmangin Modi chuan a term hnihna chhungin Jammu and Kashmir a then hrang a, Article 370 a nuaibo a, Ayodhya-ah Ram temple dinin sel hlawh citizenship law a kalpui bawk. BJP rorelna state-ah te sakhaw biak inang lote inneih theihna dan te khauh zawkin kalpui a ni bawk.
Mahse BJP tena an beisei an pha lo lutuk chhan hrang hrang zingah hna vang te, thil man sang te, intluktlanlohna sang zel te, sipai lak dan thar Agniveer te chu tela ngaih a ni. Chumai bakah Modi-an divisive campaign nataka kalpuia Muslim te a beivak chuan a sawhkhawk let tia sawi a ni bawk.
‘Ab ki baar 400 paar’ tia seat 400 chuang lak tuma NDA alliance hmalakna chuan hlet chhe zawk chhuahin mirethei leh hnuaihnung zawkah te constitution thlak danglamna thleng thei dawn anga ngaihna a awm phah hlauh zawk.
India ram state lian ber leh parliamentary seat 80 lawih awmna Uttar Pradesh chu national politics a hmun lailum luahtu ber a ni a, BJP te chuan seat 70 vel lak theih an inrinnaah pahnihna an ni zawk tlat bawk a. Chumai nilovin Ram temple awmna consitutency-ah ngei pawh an chak lo bawk.
-- Advertisement --
Brand Modi tlahniam
Modi larna chhan ber chu branding a thiam em vang niin thil thleng pangngai mai mai pawh ropui taka chhuah thiam a ni a. Chutih karah opposition chak loh vang lai ni bawk nen, media te thianah siamin a brand larna lamah an thawhhlawk hle.
Tun inthlan hian Brand Modi chuan a larna a hloh tawh hle tih a tichiang a, amah thlawptu tena hneh theih loh anga an ngaihna chu a ni tawh hauh lo, chutak chu opposition te beiseina sang tak pekbelhtu a ni ve leh thung bawk.
Coalition politics bawk
India hian coalition sorkar history turu tak tak a nei a, mahse, coalition sorkar hmangin kum 1990 leh 2000 chhovah te economic reforms pawimawh tak tak thlentir a ni hlauh thung.
BJP ten sorkar siam pawh ni se an thawhpui te milin an inher rem a ngai tawh a, fimkhur takin an duh ang thalin an che thei tawh dawn lo hrim hrim a ni. Chuvangin kum 2014 leh 2019 a hneh theih loh anga awm BJP pawh tunah chuan derthawng takin party dang ngaichangin an awm a ngai tawh dawn.
BJP nghing
Modi-an kum sawm chuang vung taka rorelna a kalpuiah political scientists te chuan one-party dominant system kalpui zel tum angin an sawi hman hial a ni.
Thuneihna chang chhunzawm zel turin charismatic leader a ni a, resources leh communication thunun vek tu a ni a, organisational machinery turu tak neiin, opposition te mumal loh lai a ni bawk a, chung karah chuan BJP te chuan one-party dominant system kalpui an tum bur tiin political scientists te chuan an ngai a ni.
Modi a BJP chu Indian politics party pakhatin hun rei tak a thunun tumkhatna a ni lo. Kum tam tak chhung chu Independence hnuah Congress ten rorelna an chang a ni. Thawhlehnia India inthlan result khan India ramah ‘normal politics’ a dinthar leh zawk tia ngaih niin party te chuan thuneihna insemzaiin an kalpui leh a ngai tawh tia sawi a ni.
Opposition phur
Congress kaihhruai opposition party te ah phurna nasa tak a thleng thung a. February thla khan opposition intelkhawm INDIA alliance chu nghing lawihin a sulsutu ber pakhat Nitish Kumar chuan chhuahsanin BJP a thawhpui zui a.
Mahse Rahul Gandhi kaihhruaina hnuaiah opposition te chuan campaign turu tak kalpuiin rim takin an thawk a ni. Hma lamah beiseina sang tak awm mekin tun atanga thla 14 chhungin state panga in inthlan an hmachhawn dawn bawk.
Kumin chhungin Maharashtra, Jharkhand leh Haryana in state assembly an thlang dawn a, BJP te tan hautak tak tur a ni dawn. Chutihlaiin India ramah intluktlan lohna a nasa zual mek a, private investment leh consumption a san a ngai a, mirethei leh middle class ten sum hman tur an neih tam a ngai bawk.
Mahse chungte chu hna a van chuan a thleng thei si lo. India ramah thalai voters te beidawn tam takin BJP an rauhsan anga ngaih niin India mipui billion chuanga hmun nga a thena hmun hnih chu kum 25 hnuailam an ni.
Modi chu Muslim te langsar taka sawisel leh thlauhthlaa puh niin India rama minority tam ber an ni lawi si a ni. Chutihrualin opposition leader te dim hauh lova nghaisak a lung ina khung leh thubuai siamsaka puh a ni bawk.
Narendra Modi chuan term thumna chelh leh pawh ni se, a term khatna leh hnihna ang ngawtin a duhthalin thil a kalpui thei tawh dawn lo va, chuvangin sawi lawk harsa tak a ni tiin political analysts te chuan an sawi.